Foto:Ashyq derekkóz
Májilis depýtaty, Agrarlyq máseleler komıtetiniń múshesi Aıdarbek Hodjanazarovtyń málimdeýinshe astyq eksportyna Úkimet 40 mıllıard teńge bólgen.
«Sońǵy eki jylda logıstıka shyǵyndary 30-40 paıyzǵa ósti. Eger bul shyǵyndar ótelmese, otandyq óndirýshilerdiń syrtqy naryqqa ónim shyǵarýlary qıyndaı túsedi, básekelestikke de qaýqarsyz bolary anyq. Biraq Úkimet der kezinde qoldaý bildirip, otandyq ónim Eýropa odan soń Afrıka elderine tasymaldanyp otyr», dedi A.Hodjanazarov.
Qazirgi kezde otandyq jumsaq bıdaıdyń alǵashqy legi Norvegııa men Marokkoǵa jóneltildi. Ulybrıtanııa men Shotlandııaǵa jetkizý boıynsha kelisimsharttar endi jasaldy. Sonymen qatar Birikken Arab Ámirlikteri, Nıgerııa, Senegal, Kot-d’Ivýar jáne Sýdan elderine de eksport kólemin ulǵaıtý boıynsha kelissóz júrgizilip jatyr.
«Otandyq jumsaq bıdaı atalǵan elderge 15 jyldan astam ýaqyt boıy eksporttalmaǵan. Biz jańa eksporttyq baǵyttardy ıgerip jatyrmyz. Bul tek logıstıkadaǵy serpilis emes, sonymen qatar syrtqy ekonomıkalyq strategııadaǵy mańyzdy jetistik», dedi depýtat.
Jalpy Úkimet bólgen sýbsıdııa temirjolmen de, teńiz arqyly da tasymaldaý túrlerin qamtıdy. Qazirgi tańda 200 myń tonnadan astam ónim - sonyń ishinde bıdaı, arpa jáne basqa da dándi daqyldar syrtqy naryqqa shyǵaryldy. Tasymaldaý shyǵyndaryn óteýge berilgen ótinimderdiń jalpy somasy 9 mıllıard teńgeden asqan. Negizi sýbsıdııaǵa bólingen qarajat kóktemgi egis jumystaryn ýaqtyly júrgizýge, bıylǵy ónimdi óńdep, saqtaıtyn oryndardy bosatýǵa jáne tutastaı alǵanda, otandyq astyqtyń halyqaralyq naryqtaǵy básekege qabilettiligin arttyrýǵa múmkindik beredi.
