25-30 sáýir aralyǵyndaǵy esep boıynsha, eń kóp anketa Aqmola oblysynan túsken – úsh kún ishinde bul óńirden 276 ótinish kelip tústi. Jambyl (108 anketa), Almaty (9 anketa), Aqtóbe (42 anketa), Atyraý (21 anketa) jáne Shyǵys Qazaqstan oblysy (34 anketa) da – belsendilik tanytqan óńirler qatarynda. Al Shymkent, Abaı jáne Ulytaý oblystarynan ázirge aqparat kelip túspegen. Sonymen qatar Reseı Federasııasynan – 49, Ýkraınadan – 12, Belarýs pen Qyrǵyzstannan birneshe anketa qabyldanǵan. Jalpy esep boıynsha portal arqyly 793 anketa tirkelip, saıtqa engizilipti.
Esterińizge sala ketsek, jýyrda maıdangerlerdi eske alýǵa arnalǵan «Batyrlarǵa taǵzym» (batyrlarga-tagzym.kz) atty jańa portal jumysyn bastaǵan-dy. Iаǵnı «Batyrlarǵa taǵzym» – Ekinshi dúnıejúzilik soǵys ardagerleriniń esimin ulyqtaý baǵytynda elimizdiń kontent keńistigine qosylǵan jańa onlaın-platforma. Bul bastamany Mádenıet jáne aqparat mınıstrligi Jeńistiń 80 jyldyǵyna oraı qolǵa alyp otyr.
Jobanyń basty maqsaty – soǵysta erlikpen shaıqasqan otandyq jaýyngerler týraly málimetterdi jınaqtap, jas urpaqqa jetkizý. Qazirgi tańda portal bazasynda 677 myńnan asa ardager týraly derek bar. Olardyń ishinde 365 Keńes Odaǵynyń batyry, 4 eki márte Batyr atanǵan jaýynger, 19 «Dańq» ordeniniń ıegeri bar. Al málimetter qory kún sanap tolyǵyp keledi.
Elordada ótken ardegerler plenýmynda Mádenıet jáne aqparat mınıstri Aıda Balaeva portal maqsatyna az-kem toqtalyp, pikir bildirgen edi.
– Ekinshi dúnıejúzilik soǵysy ardagerlerine qatysty málimetterdi birizdendirý men halyqtyń aqparatqa qoljetimdiligin qamtamasyz etý maqsatynda «Batyrlarǵa taǵzym» portalynyń qyzmeti keńeıtiledi. Portalda Qazaqstannyń jaýyngerleri týraly derekter memlekettik arhıvter men Qorǵanys mınıstrliginiń málimetteri negizinde ornalastyrylǵan, – dedi A.Balaeva.
Sondaı-aq mınıstr jýyrda óziniń «Facebook»-tegi paraqshasynda da atalǵan platforma týraly tolyǵyraq málimet jarııalady. A.Balaeva portalda keń kólemdi málimetter bazasy jınaqtalǵanyn atap ótti.
«Interfeıs qajetti aqparatty tabýǵa ǵana emes, sonymen qatar óz ardager týystary týraly derekterdi qosýǵa, jańalyqtarmen tanysýǵa múmkindik beredi. Osylaısha, bul portal tarıhty bolashaq urpaq úshin saqtap, batyrlarǵa taǵzym etip, qurmet kórsetýge arnalǵan platforma qyzmetin atqarady», dedi mınıstr.
Joba avtorlary saıttyń yńǵaıly ári ınteraktıvti bolýyna basa mán bergen. Qoldanýshylar óz týystarynyń maıdan jolyn sıpattaıtyn málimetterdi engize alady, fotosýretter men qujattardy júkteıdi jáne basqa ardagerler týraly tolyq aqparatpen tanysa alady. Sondaı-aq jańalyqtar bóliminen Jeńis kúnine oraı atqarylyp jatqan is-sharalar týraly oqı alady.
