R.Vasılenko «Jibek joly» týrnesi sheńberinde Qazaqstannyń túrli qalalarynda, sonyń ishinde Astana men Túrkistanda birqatar konsertter ótkizetin álemge áıgili hordyń kelýine oraı qoshemetin bildirdi. Sondaı-aq ol mundaı mádenı is-sharalar halyqtar arasyndaǵy ózara yqpaldastyq pen dostyqty tereńdetýge zor úles qosatynyn atap ótti.
– Qos el arasyndaǵy berik ári senimdi seriktestik burynnan qalyptasqan, qazirgi tańda ol zamanaýı jobalarmen jańaryp, damı túsýde. Biz «Madrıgal» horynyń konsertteri arqyly Rýmynııanyń baı mádenı murasymen tanysamyz. Bul shara Qazaqstanda alǵash ret ótkizilip otyr. Aıta keterligi, Hordyń oryndaýynda tek Rýmynııanyń ǵana emes, sonymen qatar Qazaqstan jáne Ortalyq Azııanyń basqa da elderiniń ánurandary bar. Qazaqtyń súıikti «Iаpyraı» jáne «Ágýgaı» halyq ánderin erekshe óńdeýde oryndaýy qos memleket arasyndaǵy rýhanı baılanysty odan ári nyǵaıta túsedi, – dedi R.Vasılenko.
Kezdesý barysynda taraptar Qazaqstan men Rýmynııa arasyndaǵy saıası jáne saýda-ekonomıkalyq yntymaqtastyqtyń damýyn talqylap, óńiraralyq baılanystardy keńeıtý múmkindikteri týraly pikir almasty.
Aıta keteıik, «Madrıgal» ulttyq kameralyq horyn 1963 jyly kórnekti rýmyn mýzykanty jáne dırıjeri Marın Konstantın qurǵan. Ujymnyń repertýarynda renessans zamanynyń, klassıkalyq mýzyka, romantızm, Vızantııa mýzykasy, sondaı-aq rýmyn jáne álemdik kompozıtorlardyń zamanaýı týyndylary bar.
