Sýretti túsirgen – Erlan OMAR, «EQ»
«Qazaqstannyń avtokólik odaǵy» (QAO) prezıdenti Anar Maqasheva sessııada salanyń turaqty damýyna negizgi shart retinde avtoklaster júıesi men komponenttik bazany damytýdyń mańyzy jóninde aıtty. О́nerkásip jáne qurylys vıse-mınıstri Oljas Saparbekovtiń aıtýynsha, avtokólik salasy turaqty ósimge ıe – 2018 jyly 31 myń kólik óndirilse, byltyr bul kórsetkish 145 myńǵa jetken. Aldaǵy meje – 160 myńnan asyrý. Onyń aıtýynsha, salanyń ári qaraı damýy tereńdetilgen lokalızasııany arttyrý men eksportqa shyǵarýǵa tikeleı baılanysty.
Birinshi memorandým «Almaty Autoparts Production» JShS men «SemAZ» JShS arasynda jasaldy. Taraptar otandyq óndiristegi avtokólik oryndyǵyn kommersııalyq tehnıka shyǵaratyn zaýytqa jetkizýge kelisti.
Ekinshi memorandým «Kaınar-AKB» JShS men «Hyundai Trans Kazakhstan» JShS arasynda jasaldy. Kelisimge sáıkes, Almatydaǵy avtokólik zaýytyna otandyq akkýmýlıator batareıalaryn jetkizý kózdelgen. Otandyq qýat kózderine kóshý óndiristik sıkldiń táýelsizdigin nyǵaıtyp, mańyzdy komponent boıynsha ımportqa táýeldilikti azaıtady. QAO prezıdentiniń pikirinshe, mundaı kelisimder elde tolyqqandy avtoklaster qurýǵa baǵyttalǵan naqty qadam, onda otandyq kásiporyndar óndiristik tizbekke tyǵyz ıntegrasııalanyp, ishki naryqpen ǵana shektelmeı, syrtqy naryqqa da básekelese alady.
«Aǵymdaǵy jáne halyqaralyq deńgeıde birlesken jobalardy ilgeriletip, uzaqmerzimdi seriktestik qatynas ornap jatyr. Odaq barlyq naryq qatysýshysyna qoldaý kórsetýdi jalǵastyra beredi», dedi Anar Maqasheva.
«Kaınar-AKB»JShS – Ortalyq Azııadaǵy eń iri akkýmýlıator batareıalaryn óndirýshi. Tolyq óndiristik sıklge ıe kásiporyn jyl saıyn aýyl sharýashylyǵy tehnıkasyna, temirjol kóligi men munaı-gaz salasynyń qajetine arnalǵan, sondaı-aq jeńil jáne júk kólikterine 3 mln-nan astam akkýmýlıator shyǵarady. Kompanııa ónimderi «Kainar», «Bars», «nomad», «vojak» sekildi tanymal brendterimen áıgili. Taýarlar Eýropa men Japonııanyń sapa standarttaryna saı keledi. О́nimniń 60%-dan astamy TMD elderi men jaqyn shetelderge eksporttalady.
«Hyundai Trans Kazakhstan» JShS qazir TMD elderinde keńinen tanymal. Almatyda «Hyundai» avtokólikterin óndirý zaýytynyń ashylýy – álemdegi iri avtoóndirýshilerdiń biri «Hyundai Motor Company» kompanııasymen óndiristik kooperasııany keńeıtýdiń jarqyn mysaly. Sonymen qatar, bul elimiz ben Koreıa Respýblıkasy arasyndaǵy ózara tıimdi yntymaqtastyqtyń tereńdeı túskeniniń dáleli.
«Hyundai Trans Kazakhstan» zaýytynyń qazirgi modeldik jelisi 8 modeldi qamtıdy – «Tucson», «Mufasa», «Sonata», «Elantra», «Santa Fe», «Palisade», «Staria» jáne «Custin». Bıyldan bastap «Elantra»-daǵy mýltımedııalyq júıe ınterfeısi qazaq tilinde qoljetimdi bolady.
Byltyr bıznes-klastaǵy «Genesis» kólikterin shyǵarý jelisi iske qosyldy. Bıyl ekinshi toqsanda «Hyundai Santa Fe» úlgisiniń CKD-óndirisi jolǵa qoıylady. «Hyundai Trans Kazakhstan» zaýyty dánekerleý, boıaý, jınaqtaý, plastık bólshekterin boıaý jáne komponentter qoımasy qyzmetterin usynady.
