Saraphana aýylyndaǵy tarıhı-etnografııalyq «Máńgilik el» saıabaǵynda boı kótergen, aty ańyzǵa aınalǵan qazaqtyń batyr qyzdaryna arnalǵan eńseli eskertkishtiń saltanatty ashylý rásimine Túrkistan oblysy men Shymkent qalasynyń soǵys jáne eńbek ardagerleri, zııaly qaýym ókilderi men aýdan turǵyndary qatysty. Qoladan quıylǵan, jalpy bıiktigi – 5,5 metr kompozısııalyq monýmenttiń artynda bıiktigi 6,5 metr bolatyn stella bar. Músinshi – Ábilhan Baıalıev. Shymkent – Tashkent halyqaralyq kúre jolynyń boıynda alystan menmundalaıtyn eskertkish saıabaqtyń ortasynda ornalasqan. Erlik pen órliktiń, náziktik pen namystyń sımvolyna, ult maqtanyshynaaınalǵan batyr qyzdardyń beınesi «Jeti jarǵy» jáne «Qojabergen jyraý» halyqaralyq qoǵamdyq qorynyń demeýshiligimen boı kóterdi.
«Ulttyq quryltaıdyń úshinshi otyrysynda Memleket basshysy Qasym-Jomart Toqaev surapyl soǵys kezindegi aǵa býynnyń óshpes erligi men eren eńbegin urpaq jadynda jańǵyrtý óte mańyzdyekenin atap ótti. Sondaı-aq Prezıdent batyrlarymyzdyń esimi eldi mekenderge, túrli nysandarǵa, kóshelerge berilgenin, ýchılıshelerdi, avıasııa bazalaryn jáne áýejaılardy batyr qyrandarymyzdyń esimimen ataý dástúrge aınalǵanyn jáne bul baǵyttaǵy jumysty jalǵastyrý qajettigin aıtty. Atyraýda ótken sol quryltaıdan soń iske kirisip, búginde osynaý eńseli esertkishti ashyp otyrmyz. Úsh batyr qyzdyń erligin dáripteý maqsatyndaǵy ıgi iske bastamashy bolǵanyma qýanyshtymyn. Erlik eshqashan umytylmaıdy. Janqııarlyq pen erliktiń ozyq úlgisin kórsetken batyrlarymyzdyń esimin osyndaı ıgi ispen ulyqtaý arqyly da jas urpaqqa beıbit ómirdiń, tynyshtyqtyń qadirin tereń túsindirýdi maqsat ettik», deıdi «Jeti jarǵy jáne Qojabergen jyraý» halyqaralyq qoǵamdyq qaıyrymdylyq qorynyń tóraǵasy, belgili zańger, Qazaqstannyń eńbek sińirgen qaıratkeri Beket Turǵaraev.
Aıta ketelik, aýmaǵy 10 gektar «Máńgilik el» saıabaǵynda qazaqtyń úsh bıinen bastap, Salqam Jáńgir han men Jalańtós batyr, Alash arystary, Anaǵa taǵzym, Ekinshi dúnıejúzilik soǵys ardagerlerine arnalǵan 30-ǵa jýyq eskertkish oryn tepken. Saıabaq aýmaǵynda 5 myń túp aǵash egilgen. Bul saıabaq búginde 110 myń halqy bar Qazyǵurt aýdany turǵyndarynyń súıikti demalys ornyna aınalǵan. Sondaı-aq óńirde týrızmniń damýyna ózindik úles qosyp keledi.
