Eske sala keteıik, Qazaqstan Respýblıkasy Prezıdenti Qasym-Jomart Toqaevtyń bastamasymen BUU Bas Assambleıasy 2026 jyldy Turaqty damý maqsattaryndaǵy Halyqaralyq volonterler jyly dep jarııalaǵan bolatyn.
Atalǵan jıynǵa QR Mádenıet jáne aqparat mınıstri Aıda Balaeva, BUU Eriktiler baǵdarlamasynyń atqarýshy úılestirýshisi Toıly Qurbanov, memlekettik organdardyń, úkimettik emes uıymdardyń jáne volonterlik birlestikterdiń ókilderi qatysty.
Jıyn barysynda mınıstr Aıda Balaeva elimizdegi volonterlik salasynda atqarylyp jatqan jumystar men otandastarymyzdyń jetistikteri jóninde baıandady.
– Qazaqstandyqtar álemniń túkpir-túkpirinde eriktilik jobalarǵa, sonyń ishinde BUU, IýNISEF sııaqty halyqaralyq uıymdardyń bastamalaryna belsendi atsalysyp keledi. Qazaqstan Úkimetiniń qoldaýymen 2020–2023 jyldar aralyǵynda toǵyz otandasymyz BUU-nyń túrli qurylymdarynda volonter retinde qyzmet atqardy. 2024 jyly jeti qazaqstandyq volonter BUU-nyń Kenııa, Taıland jáne Túrkııadaǵy agenttikterine jiberildi, – dedi Aıda Balaeva.
Ulttyq uıymdastyrý komıtetiniń otyrysynda volonterler qozǵalysyn damytýǵa jáne azamattyq belsendilikti arttyrýǵa baǵyttalǵan mańyzdy bastamalar men aldaǵy is-sharalar talqylandy. Spıkerler sonymen qatar Eriktiler jylyna daıyndyq barysy týraly aıtyp, jańa jobalarǵa qatysty usynystaryn ortaǵa saldy.
BUU Eriktiler baǵdarlamasynyń atqarýshy úılestirýshisi Toıly Qurbanov Qazaqstan tarapyna halyqaralyq eriktiler jylyn uıymdastyrýǵa belsendi kiriskeni úshin rızashylyǵyn bildirip, elimizdiń bul bastamadaǵy kóshbasshylyǵyn erekshe atap ótti.
– Sizderdiń bul saladaǵy belsendi qyzmetterińiz elimizdegi volonterlik mádenıetiniń damýyna tyń serpin berip qana qoımaı, Qazaqstandy azamattyq bastamalar salasyndaǵy mańyzdy halyqaralyq seriktes retinde tanyta bildi. Búgin Qazaqstan – BUU eriktiler baǵdarlamasyna qatysýshy el retinde óz pozısııasyn nyqtap, keleshekte basqa memlekettermen jumys barysynda biz Qazaqstannyń oń tájirıbesin úlgi retinde keltiretin bolamyz, – dedi Toıly Qurbanov.
Otyrysta taǵy bir mańyzdy jańalyq – Almaty qalasynda BUU Eriktiler qozǵalysynyń Ortalyq Azııadaǵy sýbóńirlik keńsesi ashylatyny jarııa etildi.
– Bizdiń ortaq mindetimiz – memlekettik qurylymdar, qoǵamdyq uıymdar, bilim berý mekemeleri men buqaralyq aqparat quraldary birlesip, volonterlikke qoldaý kórsetýdiń ornyqty júıesin qalyptastyrý. Bul baǵyttaǵy jumys barlyq taraptyń úılesimdi yntymaqtastyǵyna negizdelýi tıis, – dep qorytyndylady Aıda Balaeva.
