Foto: QR SDIAО́M
Sıfrlyq damý, ınnovasııalar jáne aeroǵarysh ónerkásibi mınıstrliginiń málimetinshe, EKSPO aýmaǵynda ornalasqan jańa keńse Presight kompanııasynyń BAÁ-den tys alǵashqy halyqaralyq ókildigi sanalady jáne ol Ortalyq Azııadaǵy óńirlik hab retinde qyzmet atqarady. Qazirgi tańda keńsede 40-tan astam qazaqstandyq maman jumys isteıdi.
Aıta keteıik, Qazaqstan Prezıdenti Qasym-Jomart Toqaev pen sheıh Haled bın Mohammed bın Zaıdtyń qatysýymen ótken resmı rásim barysynda Presight qatysqan úsh kelisimge qol qoıyldy:
– Astana qalasy ákimdigi jáne QR Sıfrlyq damý mınıstrligimen jalpy quny 190 mıllıon AQSh dollaryn quraıtyn «aqyldy qala» jobasyn iske asyrý týraly kelisim;
– Qazaqstannyń sıfrlyq transformasııasy aıasynda joǵary ónimdi esepteý ortalyǵyn qurý úshin eki Nvidia H200 sýperkompıýter klasterin jetkizý jónindegi kelisim.
Astanadaǵy Alem.AI ortalyǵy bazasynda elorda ınfraqurylymynyń zııatkerlik ózegine aınalatyn jaǵdaılyq ortalyq qurylady. Bul zamanaýı platforma energetıka, qoǵamdyq qaýipsizdik jáne qalalyq ınfraqurylymdy basqarý sııaqty negizgi salalarda ıntellektýaldy monıtorıng pen sheshim qabyldaýdy qamtamasyz etedi.
«Presight kompanııasynyń Astanada óńirlik keńse ashýy – Ortalyq Azııadaǵy ınnovasııalar men tehnologııalar ortalyǵy retindegi mártebemizdi nyǵaıtýdyń mańyzdy qadamy. Presight sııaqty jetekshi kompanııalarmen seriktestik sıfrlyq sheshimderdi ǵana emes, búkil qoǵam men bıznestiń damýyna jańa múmkindikter týǵyzady. Bul elimizde jasandy ıntellekt damýyna qosylatyn mańyzdy úles, ony ártúrli salalarda qoldanýǵa jol ashady», dedi QR Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Presight jobalary Qazaqstannyń jasandy ıntellekt salasyndaǵy óńirlik kóshbasshy retindegi rólin nyǵaıta túsedi.
«Astanada keńse ashý – Presight-tyń halyqaralyq keńeıýindegi mańyzdy kezeń. Qazaqstan – Presight óz qyzmetin BAÁ-den tys bastaǵan el. Bul eldiń sıfrlyq transformasııasyn qoldaýǵa jáne jasandy ıntellekt damýyna degen berik ustanymymyzdy bildiredi. EKSPO aýmaǵyndaǵy sheteldik keńsemiz Qazaqstannyń strategııalyq kóregendigine, kóshbasshylyǵyna jáne adamı kapıtalyna degen senimimizdi kórsetedi. Jergilikti saraptamany damytyp, eldiń aqyldy jáne tehnologııalyq bolashaǵyna úles qosatynymyzǵa qýanyshtymyz», dedi Presight bas dırektory Tomas Pramotedham.
Mınıstrliktiń habarlaýynsha, elordadaǵy «aqyldy qala» jobasy Qazaqstannyń jasandy ıntellekt salasyndaǵy óńirlik kóshbasshy retindegi pozısııasyn nyǵaıtady jáne sıfrlandyrýdyń jahandyq deńgeıdegi úlgisine aınalady. Joba qoǵamdyq qaýipsizdikti arttyrýǵa, qalalyq ınfraqurylymdy naqty ýaqyt rejıminde tıimdi basqarýǵa, turaqty energııa tutynýǵa jáne azamattardyń qajettilikterine baǵyttalǵan servısterdi damytýǵa baǵyttalǵan. Aıta ketý kerek, jobanyń 60%-y qazaqstandyq jetkizýshilerdiń qatysýymen júzege asady, bul jergilikti bıznestiń belsendiligin jáne el ekonomıkasyna qosqan úlesin aıqyndaıdy.
Sheıh Haled bın Mohammed bın Zaıd Ál Nahaııannyń Qazaqstanǵa jasaǵan resmı memlekettik sapary BAÁ men Qazaqstan arasyndaǵy senimge, strategııalyq seriktestikke jáne astanalardyń sıfrlyq transformasııasyna degen ortaq umtylystarǵa negizdelgen berik ekijaqty qatynastardyń aıǵaǵy. Bul sapar eki eldiń ómir sapasyn jaqsartý men turaqty damý maqsatynda ozyq tehnologııalar salasyndaǵy ortaq bastamalardy ilgeriletýge degen umtylysyn pash etedi. Presight pen Qazaqstan arasyndaǵy yntymaqtastyq eki el basshylyǵynyń tolyq qoldaýymen iske asyp jatyr. Bul seriktestik jasandy ıntellekt múmkindikterin áleýmettik-ekonomıkalyq turaqty damý úshin paıdalaný jolyndaǵy ortaq maqsattardy kórsetedi.
