Ádette jilik syndyrý oıyny soǵym soıǵan kezde bastalady. Sońǵy jyldary as pen toıda da ótkizile bastady. О́ńirdiń kóptegen aýyldarynda kádimgideı jarys ótkizilýde. Taıaýda Zerendi aýdanynda ótken «Jilik syndyrý» jarysyna alpystan astam bilekti azamat qatysqan.
Kópshilik jarysqa usynylatyn jilikti arnaıy daıyndaıdy. Bir aıta keterligi, jilikti syndyrý úshin jalǵyz kúsh jetimsiz, tásilin de bilý kerek. Syndyrǵan jigittiń aıbyny asyp, abyroıy asqaqtaıdy. Syıǵa jabaǵy jetektep, qoı beretinder de bar. Yntalandyrý úshin. Keı jerde jilik tez synyp ketpeý úshin tik qoıyp pisiredi. Endi bireýler tesip, jilik maıyn aǵyzyp jiberedi. Mundaı jilik uzaq ýaqyt synbaıdy. Ádette qoldyń jiligi tez synady. Kemik basy úlken, jýan sannyń jiligi ońaılyqpen syna qoımaıdy.
Birlestik aýylynda ótken jarysqa 12 jilik usynyldy. Baq synaýǵa kelgender jas ereksheligine qaraı úsh topqa bólindi.
– Jas seksennen asty, – deıdi aýyl turǵyny Saparbaı Júkenuly, – bala kezimizden beri kórip kelemiz. Erterekte oramal oraýshy edik, qazir apaıtós jigitter jalań qolmen-aq syndyrady. Dúbirge eleńdeıtin tulparǵa uqsap men de qarasynyn kóbeıtip jatyrmyn.
Aıtpaqshy, jilikti daıyndaýdyń qyr-syry kóp. Tabaq tartylǵannan keıin epsekti jastardyń bireýine ustatylady. Ol ábden tazalap mújip daıyndaýy kerek. Onyń da eńbegi eskeriledi.
Halqymyzben birge jasasyp kele jatqan qadirli dástúrdiń joǵalmaǵany jaqsy emes pe?!
Aqmola oblysy,
Zerendi aýdany.
