Saraphana aýylyndaǵy tarıhı-etnografııalyq «Máńgilik el» saıabaǵynda urpaqqa ulaǵat bolatyndaı, ultqa rýh beretindeı, Shyǵys halqyna ańyz bolǵan úsh batyr qyzǵa arnalǵan eskertkish boı kóterdi. Jeńistiń 80 jyldyǵyna oraı uıymdastyrylǵan eskertkishtiń saltanatty ashylý rásimine Túrkistan oblysy men Shymkent qalasynyń soǵys jáne eńbek ardagerleri, zııaly qaýym ókilderi men aýdan turǵyndary qatysyp, gúl shoqtaryn qoıyp, taǵzym etti. Qoladan quıylǵan, eskertkishtiń tuǵyrymen jalpy bıiktigi – 9,5 metr, al batyr qyzdar músininiń bıiktigi – úsh metr. Kompozısııalyq monýmenttiń artynda bıiktigi 6,5 metr bolatyn stella bar. Músinshi – Ádilhan Baıalıev. Shymkent – Tashkent halyqaralyq kúre jolynyń boıynda alystan menmundalaıtyn eskertkish saıabaqtyń ortasynda ornalasqan. Erlik pen órliktiń, náziktik pen namystyń rámizine, ult maqtanyshyna aınalǵan batyr qyzdardyń beınesi «Jeti jarǵy» jáne «Qojabergen jyraý» halyqaralyq qoǵamdyq qorynyń demeýshiligimen boı kóterdi.
– Ulttyq quryltaıdyń úshinshi otyrysynda Memleket basshysy Qasym-Jomart Toqaev surapyl soǵys kezindegi aǵa býynnyń óshpes erligi men eren eńbegin urpaq jadynda jańǵyrtý óte mańyzdy ekenin atap ótti. Sondaı-aq Prezıdent batyrlarymyzdyń esimi eldi mekenderge, túrli nysandarǵa, kóshelerge berilgenin, ýchılıshelerdi, avıasııa bazalaryn, áýejaılardy batyrlarymyzdyń esimimen ataý dástúrge aınalǵanyn jáne bul baǵyttaǵy jumysty jalǵastyrý qajettigin aıtty. Atyraýda ótken sol quryltaıdan soń iske kirisip, búginde osynaý eńseli eskertkishti ashyp otyrmyz. Erlik eshqashan umytylmaıdy, – deıdi «Jeti jarǵy» jáne «Qojabergen jyraý» halyqaralyq qoǵamdyq qaıyrymdylyq qorynyń tóraǵasy, belgili zańger, Qazaqstannyń eńbek sińirgen qaıratkeri Beket Turǵaraev.
Saltanatty rásimnen keıingi jıynda sóz alǵandar Ekinshi dúnıejúzilik soǵysynda janyn shúberekke túıip, týǵan jerdiń tynyshtyǵy úshin janqııarlyqpen kúresken batyr qyzdar búgingi urpaqqa úlgi ekenin aıtty. Maıdan dalasynda qaza tapqan Mánshúk pen Álııanyń, soǵystan aman oralyp, avıasııa salasynda eńbek etken Hıýazdyń erlikteri eske salyndy. Urpaq jadynda saqtalatyn osyndaı taǵylymdy sharalar arqyly tarıhqa taǵzym etip, batyr babalar amanatyna adaldyq tanytý qajettigi de aıtyldy. Jıynnan soń batyr qyzdardyń rýhyna quran baǵyshtalyp, arnaıy as berildi.
Aıta ketelik, aýmaǵy 10 gektar «Máńgilik el» saıabaǵynda qazaqtyń úsh bıinen bastap, Salqam Jáńgir han men Jalańtós batyr, Alash arystary, Anaǵa taǵzym, Ekinshi dúnıejúzilik soǵys ardagerlerine arnalǵan 30-ǵa jýyq eskertkish oryn tepken. Saıabaq aýmaǵynda 5 myń túp aǵash egilgen. Bul saıabaq búginde 110 myń halqy bar Qazyǵurt aýdany turǵyndarynyń súıikti demalys ornyna aınalǵan. Sondaı-aq óńirde týrızmniń damýyna ózindik úles qosyp keledi.
Túrkistan oblysy
