Foto: ashyq derekkóz
Atalǵan zań jobasy Parlament Májilisiniń depýtattarynyń bastamasymen ázirlenip, jasandy ıntellekt salasyndaǵy qatynastardy quqyqtyq turǵydan retteıtin alǵashqy keshendi qujat bolmaq. Bul týraly Ekonomıkalyq reforma jáne óńirlik damý komıteti qorytyndysynda málimdedi.
Zań jobasy jeti taraýdan jáne jıyrma segiz baptan turady. Onda eń aldymen jasandy ıntellekt salasyndaǵy ashyqtyqty, qaýipsizdikti qamtamasyz etýdiń quqyqtyq ári uıymdastyrýshylyq tetikteri bekitilgen. Sonymen qatar:
-
memlekettik organdar men kvazımemlekettik sektorda JI tehnologııalaryn qoldaný tártibi belgilenedi;
-
Úkimettiń osy saladaǵy quzyreti keńeıedi;
-
jasandy ıntellekt júıelerimen jumys isteıtin sýbektilerdiń quqyqtary men mindetteri naqtylanady.
Komıtettiń málimetinshe, zań jobasy boıynsha jumys tobyna 66 usynys túsip, olar bes otyrys aıasynda talqylanǵan. Talqylaýǵa múddeli memlekettik organdarmen qatar, qoǵamdyq uıymdar men sarapshylar da qatysqan.
Qazirdiń ózinde elimizdiń sıfrlyq damý baǵyty jasandy ıntellektke úlken senim artyp otyr. Degenmen bul tehnologııanyń múmkindigin tolyq ári qaýipsiz paıdalanýǵa quqyqtyq negizdiń bolýy sheshýshi mánge ıe.
Ekonomıkalyq reforma jáne óńirlik damý komıteti zań jobasyn birinshi oqylymda Májilistiń jalpy otyrysyna engizýdi usyndy.
