Foto: jas.kz
Búgin Memlekettik qyzmet isteri agenttiginiń tóraǵasy Darhan Jazyqbaı Prezıdenttik jastar kadr rezervine kezekti irikteýdiń erekshelikteri men kezeńderin túsindirdi.
Darhan Jazyqbaıdyń aıtýynsha, bıylǵy irikteýdiń basty ereksheligi – ár baǵyt boıynsha kandıdattardyń birkelki sanyn qamtamasyz etý maqsatynda árbir kezeńde proporsıonaldy irikteý ótedi. Rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziledi. Bul ádis salalar arasyndaǵy teńgerimdi, naqty baǵyttar boıynsha úmitkerlerdi irikteýdi qamtamasyz etedi.
«Irikteý memlekettik apparattyń salalyq kadrlarǵa qajettiligin eskere otyryp, ınfraqurylym, ónerkásip jáne saýda saıasaty, agroónerkásiptik keshen jáne qorshaǵan orta, syrtqy saıasat jáne ınvestısııalar; ekonomıkalyq jáne qarjylyq saıasat, sıfrlandyrý, áleýmettik saıasat jáne azamattyq qoǵam syndy 6 negizgi sala boıynsha júrgiziledi. Kandıdat tirkelý kezinde kórsetilgen salalyq baǵyttardyń birin tańdaýy qajet. Úmitkerlerge qoıylatyn talaptar: irikteýge jasy 35-ten aspaǵan, joǵary bilimi jáne 5 jyl jalpy jumys tájirıbesi bar, memlekettik tildi V1 deńgeıinen tómen emes meńgergen Qazaqstan Respýblıkasynyń azamaty qatysa alady», dedi Memlekettik qyzmet isteri agenttiginiń tóraǵasy.
Prezıdenttik jastar kadr rezerviniń múshesi bolý úshin úmitkerler 6 kezeńnen turatyn keshendi irikteýden ótýi tıis.
Qujattardy qabyldaý 1-30 maýsym aralyǵynda pkrezerv.gov.kz resmı platformasynda onlaın rejımde júzege asyrylady. Irikteýdiń obektıvtiligin qamtamasyz etý úshin kandıdattardyń derekteri jeke nómir berý arqyly jasyrylady. Baǵalaýshylar úshin úmitkerdiń kim ekendigi beımálim bolady.
Mátindik jáne sandyq aqparatpen jumys isteý qabiletin baǵalaý – testileý proktorıng júıesimen, aýdıo jáne beınefıksasııamen ótedi. Bul rette de ádildik pen ashyqtyq qamtamasyz etiledi. Talaptarǵa sáıkes keletin barlyq kandıdat mátindik aqparatpen jumys isteý qabiletin baǵalaýdan ótedi. Bul rette sandyq testileýge ár salalyq baǵyt boıynsha eń kóp ball jınaǵan kandıdattardyń 50%-y jiberiledi.
Sıtýasııalyq tapsyrmalardy sheshý kezeńi kandıdattardyń tańdaǵan salalyq baǵyttaryna baılanysty naqty problemalardy sheshý boıynsha usynystaryn baǵalaýǵa baǵyttalǵan. Bul kezeń onlaın-rejımde esse jazý formatynda ótedi.
Assessment-ortalyǵy men quzyretter boıynsha suhbat – oflaın formatta, Prezıdent janyndaǵy memlekettik basqarý akademııasynda ótetin bul kezeńde úmitkerler minez-qulyq ındıkatorlary jáne kásibı quzyretter boıynsha toptyq jáne jeke tapsyrmalardy oryndaıdy. Onlaın formattaǵy jeke suhbat kásibı HR-menedjerlermen ótkiziledi.
Sarapshylyq komıssııamen áńgimelesý arnaıy komıssııamen suhbattasý túrinde júzege asyrylady. Onyń qorytyndysy boıynsha Ulttyq komıssııa otyrysyna 100-den aspaıtyn kandıdat tizimi usynylady.
Ulttyq komıssııa otyrysynyń qorytyndysymen úzdik 50 kandıdat Prezıdenttik jastar kadr rezervine qabyldanady.
Irikteýdiń ashyqtyǵy men ádildigin qamtamasyz etý maqsatynda kandıdattardy baǵalaý nátıjeleri olardyń jeke kabınetinde jáne kezeń qorytyndysy boıynsha aqparat resmı saıtta jarııalanady.
