Eki kúnde forýmǵa elimizben qatar Reseı, Belarýs, Ýkraına, Mońǵolııa, Úndistannan kelgen shamamen 400 qatysýshy men 40 spıker qazirgi dıagnostıka men emdeýdiń zamanaýı tásilderin talqylady. Biregeı endoskopııalyq aralasý ádisterin kórsetip, onkologııa, endoskopııa, gastroenterologııa, pýlmonologııa jáne osy salalarǵa jaqyn baǵyttar boıynsha ozyq tehnologııalardy engizý tájirıbesin bólisti.
Forýmnyń ashylýynda Densaýlyq saqtaý vıse-mınıstri Erjan Nurlybaev endoskopııalyq dıagnostıkalaý men emdeý ádisterin damytýdyń mańyzyn atap ótti. Ol byltyr onkologııalyq qyzmet máseleleri jónindegi úılestirý keńesinde oblystyq onkodıspanserler bazasynda mamandandyrylǵan joǵary tehnologııalyq endoskopııalyq ortalyqtar qurý týraly strategııalyq sheshim qabyldanǵanyn eske saldy.
«Konferensııanyń basty maqsaty – kúshti biriktirip, joǵary bilikti mamandardy tartý. Dál osy ortalyqtarda klınıkalyq tájirıbe jınaqtalyp, ınvazıvti dıagnostıka men emdeý ádisteri damıdy. Búginde mundaı endoskopııalyq ortalyqtar tek onkodıspanserlerde ǵana emes, sondaı-aq beıindi stasıonarlar bazasynda da elimizdiń barlyq óńirlerinde derlik ashyldy. Joǵary tehnologııaly, az ınvazıvti dıagnostıka ádisteri eń aldymen halqymyzdyń ómir sapasyn arttyrýǵa baǵyttalǵan. Forým úzdik tájirıbeler almasýǵa arnalǵan mańyzdy alańǵa aınalatynyna senimdimin. Mundaı kásibı kezdesýlerdiń qundylyǵyn asyra baǵalaý qıyn – olar kásibı baılanystardy nyǵaıtyp, endoskopııalyq medısınanyń bolashaǵyna áser ete alatyn jańa ıdeıalardyń kózine aınalady», dedi vıse-mınıstr.
Forýmnyń basty spıkerleriniń qatarynda endoskopııa salasynyń álemge áıgili sarapshylary bar. О́ńeshtiń zamanaýı endoskopııalyq hırýrgııasynyń negizin qalaýshylardyń biri, professor Harýhıro Inoe (Japonııa), asqazan obyryn erte dıagnostıkalaý jónindegi maman, professor Tomohıko Morııama (Japonııa), toq ishek dısseksııasy salasynyń sarapshysy, professor Chon Son Ý (Ońtústik Koreıa), ıntervensııalyq bronholog doktor Harı Kıshan Gonýgýntla (Úndistan), asqazan-ishek jolynyń tómengi bólimderindegi endoskopııa boıynsha álemdik deńgeıdegi sarapshy professor Hıroshı Kashıda (Japonııa) syndy bilgirler bas qosty.
Forým aıasynda zamanaýı endoskopııalyq jabdyqtar, onyń ishinde jasandy ıntellekti bar júıeler, az ınvazıvti aralasýlarǵa arnalǵan qurylǵylar, erte kezeńdegi obyrdy dıagnostıkalaý men emdeýge arnalǵan arnaıy quraldar usynylǵan kórme de jumys istep tur.
«Onkologııadaǵy endoskopııanyń orny erekshe: ol qaterli de, qatersiz de isikterdiń bar-joǵyn anyqtap qana qoımaı, isikterdi az ınvazıvti tásilmen alyp tastaýǵa múmkindik beredi. Qazirgi tańda bastapqy kezeńdegi qaterli isikterdi olar tereń ınvazııaǵa jetpeı turyp alyp tastaý boıynsha joǵary tehnologııalyq operasııalar júrgizilýde. Biz endoskopııanyń búkil múmkindikterin kórsetkimiz keledi»,– dedi Qazaqstan endoskopııalyq qoǵamynyń tóraǵasy, UǴOO eksperttik endoskopııa bóliminiń meńgerýshisi Qanat Batyrbekov.
Forýmnyń praktıkalyq bóligi búgin, 16 mamyrda jalǵasty. Baǵdarlamada halyqaralyq mentorlardyń qatysýymen sımýlıasııalyq stansııalardaǵy trenıngter jáne live-sessııalar, operasııa zaldarynan tikeleı translıasııalar uıymdastyryldy.
