Mundaı sheshim, eń aldymen, shuǵyl qyzmetterdiń ashyqtyǵyn arttyrýǵa, azamattardyń alańdaýshylyǵyn azaıtýǵa jáne dıspetcherlik ortalyqtyń jumysyn jeńildetýge baǵyttalǵan.
Astana qalasy jedel járdem qyzmetiniń málimetinshe, operatorlar táýligine 6000-ǵa deıin qońyraý qabyldaıdy. Sonyń ishinde 40 paıyzdaıy – jedel járdemniń kelý ýaqytyna qatysty qaıtalama saýaldar. Avtomattandyrylǵan habarlama júıesi osyndaı artyq qońyraýlardyń sanyn azaıtyp, resýrstardy shynymen shuǵyl kómek qajet etetin jańa shaqyrtýlarǵa jumsaýǵa múmkindik beredi.
Jańa júıe ázirge Astana qalasynda jáne tek jedeldiktiń birinshi sanaty boıynsha keıbir shaqyrtýlarǵa engizildi. Aldaǵy ýaqytta bul bastamany elimizdiń basqa óńirlerine de keńeıtý kózdelip otyr.
Densaýlyq saqtaý vıse-mınıstri Erbol Ospanov bul sıfrlyq jańalyqtyń artyqshylyqtaryna toqtalyp ótti:
«Jedel járdem brıgadasynyń qozǵalysyn kórý múmkindigi — tehnologııalar arqyly ashyqtyqty qamtamasyz etý, shaqyrǵan adamdardyń alańdaýshylyǵyn azaıtý jáne dıspetcherlerge túsetin júktemeni azaıtýdyń bir mysaly. Sonymen qatar, sıfrlyq habarlama berý brıgadanyń kelýine daıyndalýǵa kómektesedi, mysaly, aýladaǵy shlagbaýmdy ashý nemese pasıenttiń qujattaryn daıyndaý sekildi», dedi vıse-mınıstr.
Jańa fýnksııa Iаndeks Kartanyń JavaScript API sheshimi arqyly júzege asyrylǵan.
Densaýlyq saqtaý mınıstrligi bolashaqta bul júıeni búkil respýblıka kóleminde engizip, árbir azamatqa medısınalyq kómektiń qoljetimdiligi men sapasyn arttyrý jolyndaǵy sıfrlyq reformalaryn jalǵastyrmaq.
