Byltyr qysta azamattardy alaıaqtyq shemalardan qorǵaý maqsatynda elimizde bankter men mıkroqarjy uıymdarynan jańa nesıe alýdan óz erkimen bas tartýǵa múmkindik beretin «Stop kredıt» memlekettik qyzmeti engizildi. eGov.kz portalyndaǵy jáne eGov mobile qosymshasyndaǵy tegin qyzmettiń kómegimen árbir qaryz alýshy mundaı shekteýdi ózi belgileıdi. Sondaı-aq paıdalanýshy kez kelgen ýaqytta nesıeler men qaryzdardy alýǵa belgilengen shekteýlerdi alyp tastaı alady. Mańyzdysy, eger azamat nesıe alýdan erikti túrde bas tartýdy ornatsa, biraq osy kezeńde oǵan zańsyz kredıt resimdelgen bolsa, onda bank nemese MQU qaryz jónindegi bereshekti esepten shyǵarýǵa mindetti. Qazirde 2 mln azamat osy múmkindikti paıdalanyp, nesıeler men shaǵyn qaryzdardy resimdeýge erikti tyıym salýdy belgileýge ótinim bergen.
Kredıt alýdan erikti túrde bas tartý jeke bas derekteri alaıaqtardyń qolyna túsken kúnde de úlken qarjylyq problemalardan saqtaı alady. Máselen, azamat jeke kýáligin joǵaltsa nemese onyń derekteri urlansa, qylmysker onlaın-ótinimdi paıdalanyp bankte nemese MQU-da nesıe resimdeýi múmkin. «Stop kredıt» ornatylǵan bolsa, júıe operasııanyń jolyn kesip, uıym avtomatty túrde kredıt resimdeýden bas tartady. Sol sekildi qaryzdy ruqsatsyz kirgen onlaın-bankıng arqyly resimdeıtin faktiler kezdesedi. Aıtalyq, alaıaqtar fıshıngtik saıttar nemese urlanǵan málimetter bazasy arqyly sizdiń onlaın-bankıngińizge ruqsatsyz kirdi delik. Ádette olar sizdiń atyńyzǵa birneshe ret basý arqyly kredıt resimdeı alady. Eger «Stop kredıt» iske qosylyp tursa, ruqsatsyz ashylǵan akkaýntqa qaramastan qaryz maquldanbaıdy.
Búginde «jalǵan bankırlerdiń» qatysýymen bolatyn alaıaqtyq áreketten árkim-aq habardar. Ádette olar «bankten» qońyraý shalyp turǵanyn, atyńyzǵa áldekim kredıt alýǵa oqtalǵanyn habarlap, odan soń aqshańyzdy «qaýipsiz shotqa aýdarý qajettigine» ılandyrmaq bolady. Eger «Stop kredıt» qyzmeti aldyn ala qosylǵan bolsa, qylmysker deregińizdi alǵannyń ózinde qaryz resimdeı almaıdy. Sol sııaqty qaryzdan erikti túrde bas tartý «qarjy keńesshisi» nemese «tıimdi bıznes» degen syltaýmen kredıt alýǵa kóndiretin dosyńyzǵa nemese tanysyńyzǵa da sabaq bolmaq. Servıs onlaın-kredıtterdi berýdi avtomatty túrde buǵattaıdy.
Alaıda aıla-sharǵynyń nebir túrin meńgergen ákki urylar bul jańashyldyqty da óz paıdasyna sheshýge kóshken. Kezekti ret ázirlengen alaıaqtyq shemasy boıynsha bank qyzmetkeriniń atyn jamylǵan adam yqtımal jábirlenýshige qońyraý shalyp, qazirgi ýaqytta onyń atyna nesıe alýǵa ótinish berilgenin eskertedi. Sóıtip, odan nesıe resimdeýge áreket etkenin rastaıtynyn ne rastamaıtynyn suraıdy. Kútpegen saýaldan tosylǵan azamat ádette eshqandaı ótinish bermegenin aıtyp, aqtalady. Mundaı jaýapty aldyn ala boljaǵan aılaker kredıt alýǵa ótinimniń kúshin joıǵanyn habarlaıdy. Artynsha mundaı jaǵdaıdy boldyrmaý úshin «Stop kredıt» servısin paıdalanýdy usynady. Ol úshin azamatqa kredıtten erikti túrde bas tartatyn pishindi toltyrý qajettigin aıtyp, banktiń resmı saıtyna silteme jiberedi. Shyn máninde bul silteme jeke jáne qarjylyq aqparatty jınaý maqsatynda qurylǵan fıshıngtik saıtqa aparady. Osy saıttaǵy úlgini toltyra otyryp, tutynýshy alaıaqtarǵa ózderiniń derbes derekterin jarııa etedi.
Sondyqtan qarjy mamandary nesıe berýge óz betinshe tyıym salýdy bankterdiń saıttarynda emes, elektrondyq úkimet portalyndaǵy jeke kabınette nemese eGov mobıldi qosymshasynda ǵana derbes qoıýǵa bolatynyn, beıtanys adamdar nusqaý berip SMS nemese messendjerler arqyly túsiniksiz siltemelerge ótýdi usynǵan kezde asa muqııat, saq bolý qajettigin eske salady.
