Sýret: ustinka.kz
Senat depýtattary, Ulttyq ekonomıka mınıstrliginiń basshylyǵy, «Atameken» Ulttyq kásipkerlik palatasy men jergilikti bıznes-qaýymdastyq ókilderi qatysqan jıynda jan-jaqty máseleler talqylandy. Shyǵys Qazaqstan óńirinde memleket-jekemenshik seriktestigi sheńberinde júzege asyp jatqan jobalar joq emes. Búgingi tańda aımaqta jalpy quny 12,2 mlrd teńgeniń 47 memleket-jekemenshik seriktestik sharty jasalǵan. Onyń basym bóligi bilim salasyna qatysty. Dálirek aıtsaq, 4,3 mlrd teńgeniń 44 shartyna qol qoıylyp, mór soǵylǵan. Qalǵan úsh joba dene shynyqtyrý jáne sport (quny 7,8 mlrd teńge), kólik (24,6 mln teńgege) pen densaýlyq saqtaý (16,7 mln teńge) salalaryna tıesili. Osy rette jasalǵan sharttardyń 87 paıyzy memlekettik mindettemelerdi tóleýdi talap etpeıtin 3 sanattaǵy jobalar ekenin aıtqan jón.
– Memleket-jekemenshik seriktestigi aıasynda qolǵa alynǵan jobalardyń úlesi boıynsha Shyǵys Qazaqstan oblysy – elimizde úzdik úshtiktiń qatarynda. Degenmen sizderdiń oblystaryńyzdaǵy jobalardyń túgeldeı derligi bilim, densaýlyq saqtaý men deneshynyqtyrý jáne sport sııaqty salalardy qamtıdy. Endi basqa baǵyttarda da jumys júrgizý qajet. Máselen, oblysta týrızm, ónerkásip, aýyl sharýashylyǵy syndy salalardyń áleýeti óte joǵary. Jalpy, respýblıkamyzda 2017–2021 jyldar aralyǵynda memleket-jekemenshik seriktestik baǵyty qarqyndy damyǵanyn bilesizder. Alaıda keıingi tórt jylda bul jumys báseńdep qaldy. Nege? Búgingi basqosýda osy máseleni de jan-jaqty talqyladyq, – dedi Senat depýtaty Nurlan Bekenov.
Bekbolat Orynbekovtiń aıtýynsha, elimizde memleket-jekemenshik seriktestiginiń qarqyny báseńdep qalýyna zań shıkiligi de áserin tıgizip jatyr. Senat depýtaty qoldanystaǵy zań jobalary kásipkerler úshin túsiniksiz ekenin aıtty. Sol sebepti kóp jaǵdaıda bıznes-qaýymdastyq mundaı jobalarǵa qatysýdan bas tartyp jatady.
Alqaly jıynda qatysýshylar osy jáne basqa da máselelerge qatysty pikir bildirip, usynystaryn jetkizdi. Jıynǵa tóraǵalyq etken oblys ákimi Nurymbet Saqtaǵanov Parlament depýtattary men jergilikti bıznes qaýymdastyq kótergen máseleler oryndy ekenin jáne tyǵyryqtan shyǵý úshin zańnamaǵa ózgeris engizý qajet ekenin aıtty.
– Kesheli beri oblysymyzdaǵy memleket-jekemenshik seriktestik sheńberinde júzege asyrylyp jatqan jobalarmen tanysyp júrsizder. Syn-eskertpelerińiz de bar eken. Onyń bári eskeriledi. Negizi, biz dıalogke ashyqpyz. Investorlarmen jumys isteýge, olarǵa jaǵdaı jasaýǵa daıynbyz. Al búgingi jıynda kóterilgen máseleler men aıtylǵan usynystardy Úkimetke jetkizesizder dep oılaımyn, – dedi N.Saqtaǵanov.
Depýtattardyń alǵashqy jumys sapary kúni kásipkerler men óńirlik salalyq basqarma basshylarynyń qatysýymen ashyq dıalog alańy ótkizilgen. Kezdesýde memleket-jekemenshik áriptestikti damytý jáne bıznestiń damýyna kedergi keltiretin ákimshilik tosqaýyldardy joıý máseleleri talqylanǵan.
Shyǵys Qazaqstan oblysy – MJÁ jobalaryn iske asyrý boıynsha jetekshi óńirlerdiń qatarynda. Búginde óńirde jalpy quny 12 mlrd teńgeden asatyn 47 joba bar. ShQO-da ázirlengen ınvestorlardy súıemeldeý algorıtmderi tıimdi dep tanylyp, basqa óńirlerge engizý usynylǵan. Kásipkerler tarapynan agrarlyq salanyń damýyna tikeleı áser etetin veterınarlyq erejelerdi jetildirý boıynsha da mańyzdy usynystar aıtyldy. Sonymen qatar Salyq kodeksin jetildirýge qatysty bastamalar men eskertýler kóterildi.
Shyǵys Qazaqstan oblysy
