Sýret: facebook.com/mazhilis.kz
Depýtat Aıdos Sarymnyń tóraǵalyǵymen ótken otyrysqa qoǵamdyq palata múshelerimen qatar zań jobalary jónindegi jumys toby, Májilis pen barlyq deńgeıdegi máslıhat depýtattary, múddeli memlekettik organdardyń, Adam quqyqtary jónindegi ulttyq ortalyqtyń jáne sarapshylar qaýymdastyǵynyń ókilderi qatysty.
Jıynda Aıdos Sarym Qoǵamdyq palata óz jumysy barysynda quqyq buzýshylyqtyń aldyn alý taqyrybyn túrli aspekti boıynsha, onyń ishinde esirtki, oıynǵa táýeldilik, turmystyq zorlyq-zombylyqtyń taralýyna qarsy kúreske baılanysty birneshe ret talqylaǵanyn atap ótti.
– Memleket basshysy 2024 jylǵy 2 qyrkúıektegi halyqqa Joldaýynda bul máselelerdi bólshektep emes, júıeli túrde sheshý kerek ekenin basa aıtty. Búginde bul jumystyń júrgizilýine qatysty negizgi shaǵymdar bar, sondyqtan osy zań paıda boldy. Alda bizdi úlken reforma kútip tur, – dedi A.Sarym.
Onyń aıtýynsha, respýblıkanyń Quqyqtyq saıasatyn 2030 jylǵa deıin damytý tujyrymdamasyna sáıkes, memlekettik saıasattyń basym baǵyty – repressııalyq sharalardyń aldyn alýǵa ekpin berý.
Ishki ister mınıstriniń orynbasary Igor Lepeha jıynǵa qatysýshylardy «Quqyq buzýshylyqtyń profılaktıkasy týraly» zań jobasy men ilespe túzetýlerdiń erejelerimen tanystyrdy. Negizgi joba aıasynda ákimdikterge profılaktıkalyq is-sharalardy qoldaný quzyretin barlyq memlekettik organǵa berý arqyly aldyn alý salasynda naqty ókilettikter berý, qylmystyń aldyn alý júıesin ońtaılandyrý usynylady.
Bul rette jańa zań qabyldanǵan kezde qoldanystaǵy bes zań kúshin joıady. Olardyń qatarynda «Turmystyq zorlyq-zombylyqtyń profılaktıkasy týraly» zań da bar. Maqsut Narikbayev University qaýymdastyrylǵan professory, qoǵamdyq palata múshesi Músilim Hasenov mundaı ádis byltyr qabyldanǵan áıelder quqyqtary men balalardyń qaýipsizdigi máseleleri boıynsha zańmen nyǵaıtylǵan turmystyq zorlyq-zombylyqqa qarsy kúrestiń elimizde qalyptasqan júıesine nuqsan keltiretinin aıtyp qaldy.
Otyrys barysynda Májilis depýtattary Magerram Magerramov, Únzıla Shapaq, Densaýlyq saqtaý vıse-mınıstri Erjan Nurlybaev, Maqsut Narikbayev University Konstıtýsııalyq jáne saıası zertteýler ınstıtýtynyń dırektory Álııa Orazbaeva, Qazaqstannyń kásibı áleýmettik qyzmetkerleriniń Ulttyq alıansynyń atqarýshy dırektory Dınara Esimova, «Parlamentarızm ınstıtýty» ShJQ» RMK atqarýshy dırektory Almas Qanatov jáne basqalar quqyq buzýshylyqtyń aldyn alý salasyndaǵy zańnamaǵa qatysty óz kózqarastarymen bólisti.
Jıyn sońynda A.Sarym otyrys barysynda aıtylǵan pikirler men saraptamalyq qorytyndylar qoǵamdyq palatanyń qorytyndy usynymdarynda jınaqtalyp, zań jobalarymen odan ári jumys isteý úshin jumys tobyna beriletinin aıtty.
