«Jýyrda Úkimet shekarany ashyp, et eksportyn qaıta bastaýǵa ruqsat berdi. Biraq buǵan deıin ishki naryqty qorǵaý úshin eshqandaı daıyndyq jasalmaǵan.Úkimet janar-jaǵarmaı baǵasynyń ósýin, aýyl sharýashylyǵy tehnıkasyna qajet qymbat qosalqy
bólshekterdi,sondaı-aq ónim tapshylyǵy qaýpin múlde eskermegen», dedi Magerram Magerramov.
Depýtattyń aıtýynsha, Úkimet et eksportyna qatysty esep júrgizbegen. Eksporttalǵan mal basyn ishki naryqta qalpyna keltirý úshin kem degende úsh jyl qajet.
«Eksporttyń artynan mal sany azaıdy, ishki naryqta sıyr eti tapshy boldy. Baǵa sharyqtap ketti. Buryn jylqy eti sıyr etinen qymbat bolatyn, endi kerisinshe – sıyr eti birneshe ese qymbattap ketti. Bul – el tarıhynda buryn-sońdy bolmaǵan jaǵdaı», dedi ol.
Magerramov Úkimettiń mal sharýashylyǵyna shekara ashylǵanǵa deıin jetkilikti nazar aýdarmaǵanyn, sonyń saldarynan qarapaıym halyq zardap shegip otyrǵanyn aıtty.
«2019 jyly Aýyl sharýashylyǵy mınıstri bekitken sýbsıdııalaý erejeleri tek iri kásip ıelerine ǵana qolaıly. Shaǵyn fermerler kóleńkede qaldy. Jem-shóp sýbsıdııasy da tek iri sharýashylyqtarǵa tıimdi boldy», dedi depýtat.
Sondaı-aq, ol «Aýyl Amanaty» baǵdarlamasy boıynsha bólingen qarjynyń qaıta óńdeý sektoryna baǵyttalǵanyna toqtalyp, bul qarjynyń tıimdi ıgerilmegenin aıtty.
«Qaıta óńdeý úshin aldymen ónim bolý kerek qoı. Qazir óńdeıtin ettiń ózi joq. Sondyqtan bul qarjyny mal sharýashylyǵyn damytýǵa jáne mal soıý ınfraqurylymyn qurýǵa baǵyttaý kerek», dep atap ótti Magerramov.
Depýtat elde mal soıý oryndarynyń jetispeıtinin, keı aýdandarda 300 shaqyrymǵa sozylatyn aýmaqta bir ǵana soıý pýnkti baryn synǵa aldy.
Depýtattyń Úkimetke joldaǵan usynystary men suranystary kelesideı:
-
2023 jylǵy qyrkúıekten 2024 jylǵy qyrkúıekke deıin eksporttalǵan sıyr eti kólemin jarııalaý;
-
2024 jylǵy qazannan 31 jeltoqsanǵa deıingi et eksporty týraly naqty derekter usyný;
-
2025 jyldyń alǵashqy toqsanyna qatysty eksport kólemin kórsetý;
-
Jergilikti atqarýshy organdar úshin shaǵyn jáne orta fermerlerdi qoldaý baǵdarlamalaryn ázirleý, óńirlik kartalar jasaý;
-
«Aýyl Amanaty» baǵdarlamasy aıasyndaǵy qarajatty mal sharýashylyǵyn damytý men mal soıý oryndaryn salýǵa baǵyttaý;
-
Aýyl sharýashylyǵy mınıstrligine mal soıý oryndarynyń tıptik úlgisin jasap, olardy tirkeýdiń avtomattandyrylǵan júıesin engizýdi tapsyrtý;
-
Memleket-jekemenshik áriptestik (MJÁ) aıasynda mal soıý oryndaryn salý jobalaryn iske asyrý;
-
Memlekettik satyp alý portalyna sıyr etimen qatar jylqy etin de engizý, bul baǵany turaqtandyrýǵa kómektesedi.
«Búginde halyqtyń ál-aýqatyna tikeleı áser etip otyrǵan mundaı jaǵdaıǵa Úkimet beıjaı qaramaýy kerek. Et eksporty – paıda kózi ǵana emes, azyq-túlik qaýipsizdigine tikeleı baılanysty strategııalyq másele. Sondyqtan bul salada júıeli reforma men ádil qoldaý kerek», dep túıindedi Magerramov.
