foto: gov.kz
«Bilim berý prosesinde Prezıdent belgilegen «Adal azamat» tujyrymdamasynyń negizinde oqýshylardy ádildikke, eńbekqorlyqqa jáne adamgershilikke baýlıtyn qundylyqtar júıesi qalyptasqan. Balalar erte jastan bastap eńbekti qurmetteý, áleýmettik ádilettilik, adaldyq jáne jaýapkershilik prınsıpterin úırenedi. Osy tulǵalyq jeke qasıetterdi biz Qazaqstannyń tabysty damýynyń negizi dep sanaımyz», dep atap ótti Ǵanı Beısembaev.
Mınıstrdiń aıtýynsha, taǵy bir mańyzdy baǵyt — erte kásibı baǵdar berý. Bastaýysh mektepte balalar ártúrli mamandyqtarmen tanysady, jobalyq aptalarǵa qatysady. 7-synyptan bastap tereń kásibı baǵdar berý bastalady. Ár oqýshyǵa túrli sala boıynsha tálimger taǵaıyndalady. Olar birlesip jeke oqý josparyn jasaıdy: beıindik kýrstar, sheberlik synyptaryna qatysady jáne tájirıbelik ártúrli mamandyqtarda ózderin synap kóredi.
«Negizgi másele — kadrlyq qamtamasyz etý. Ol úshin biz zamanaýı bilim berý tásilderi men sıfrlyq quraldardy ıgerýge baǵyttalǵan pedagogterdiń biliktiligin arttyrýdyń arnaıy baǵdarlamalaryn ázirledik. Búginde úsh myńnan astam pedagog oqytýdan ótti, bul jumys alda da jalǵasyn tabady», dedi oqý-aǵartý mınıstri.
Sondaı-aq joba aıasynda tıimdi basqarý qaǵıdattary engizilýde. Mektep dırektorlaryn taǵaıyndaý kezinde «Bilim berýdegi ózgeristerdiń 1000 kóshbasshysy» jobasynyń qatysýshylaryna basymdyq beriledi. Bolashaqta jaıly mektepterde tájirıbeden ótken tabysty basqarý praktıkalary men bilim berý standarttary Y.Altynsarın atyndaǵy Ulttyq bilim akademııasynyń bazasynda basqarýdyń arnaıy júıesi arqyly búkil respýblıkaǵa keń aýqymda taratylady.
Mınıstr endi bul strategııalyq jobanyń «Keleshek mektepteri» dep atalatynyn aıtty. Sondaı-aq, joba aıasynda mektep qurylysy jeke sektorlarda turǵyzylǵan nysandarǵa qaraǵanda 1,5-2 ese arzanǵa túsetinine nazar aýdardy.
