«Keleshek mektepteri» – ozyq bilim men teń múmkindik

Onyń aıtýynsha, qazirge deıin 105 mekteptiń qurylysy aıaqtalǵan, bıyl taǵy 112 bilim oshaǵy paıdalanýǵa beriledi. Sondaı-aq mınıstr endi bul strategııalyq joba «Keleshek mektepteri» dep atalatynyn jetkizdi.

Memleket basshysy usynǵan «Jaıly mektep» modeli – qazirgi zamanǵy oqytý standarttaryna saı biryńǵaı keńistik qurý arqyly elimizdegi orta bilimniń deńgeıin júıeli arttyrýdy kózdegen strategııalyq bastama. Sonymen qatar joba qalalyq jáne aýyldyq mektepter arasyndaǵy alshaqtyqty joıýǵa baǵyttalǵan.

«Jobany iske asyrý elıtalyq oqý oryndaryn qurýǵa emes, bilim sapasynyń joǵary standarttaryn jappaı engizýge baǵyttalǵanyn atap ótý mańyzdy. Bul ár balanyń tolyqqandy damýyna múmkindik  beredi», deıdi mınıstr.

Ǵanı Beısembaevtyń aıtýynsha, «Jaıly mektepterdiń» basty artyqshy­lyǵy – oqýshy qajettilikterine tolyq baǵdarlanǵan yńǵaıly jáne ergono­mıkalyq orta qurý. Mundaı bilim oshaqta­rynda zamanaýı beınebaqylaý jáne mektepke kirip-shyǵýdy qadaǵalaý júıelerin ornatý arqyly balalar qaýipsizdigine erekshe nazar aýdarylady. Sonymen qatar bas­taýysh jáne joǵary synyp oqýshylaryna arnalǵan bloktardyń bólek bolýy qaýipsiz ári jaıly ortany qamtamasyz etedi.

«Kedergisiz orta qurý maqsatynda pandýs­tar, jedelsatylar, erekshe qajetti­likteri bar balalar erkin qozǵala alatyndaı arnaıy sanıtarlyq bólmeler qaras­tyrylǵan. Resýrstyq kabınetter jáne mamandandyrylǵan synyptar bar. Máselen, aýtızm belgisi bar balalar úshin 121 mektepte jeke kabınetter ashyldy», deıdi sala basshysy.

Mınıstr endi bul strategııalyq jobanyń «Keleshek mektepteri» dep atalatynyn aıtty. Sondaı-aq joba aıasynda mektep qurylysy jeke sektorlarda turǵyzylǵan nysandarǵa qaraǵanda 1,5-2 ese arzanǵa túsetinine toqtaldy. Buǵan qosa bul bastama óńirlik ekonomıkany birneshe baǵytta yntalandyratynyn da atap ótti.

«Birinshiden, mektep qurylystaryna jergilikti qurylys kompanııalary men jumys­shy brıgadalar tartylady. Bul jańa jumys oryndarynyń qurylýyna tikeleı áser etedi. Ekinshiden, ár jańa mektep – pedagogter men tehnıkalyq qyzmetker­ler úshin jańa jumys orny. Jalpy alǵan­da, elimiz boıynsha barlyq jańa mektepti kadrmen qamtamasyz etý úshin 2026 jylǵa deıin 30 myńnan astam muǵalim qajet bolady», deıdi Ǵanı Beısembaev.

Mınıstrdiń aıtýynsha, taǵy bir mańyz­dy baǵyt –  erte kásibı baǵdar berý. Bas­taýysh mektepte balalar túrli maman­dyqpen tanysady. 7 synyptan bas­tap tereń kásibı baǵdar berý bastalady.

Joba aıasynda elimizde júzden astam jańa mektep salyndy. Bul myńdaǵan oqýshynyń bilim alý jaǵdaıyn edáýir jaqsartty. Mysaly, elordada «Jaıly mektep» standarty boıynsha toǵyz jańa mektep ashylyp, ol úsh aýysymdy oqytý máselesin ishinara sheshýge múmkindik berdi.

Aqmola oblysynda táýelsizdik alǵan­nan beri alǵash ret jańa zamanaýı mektep boı kóterdi. Al Almaty obly­synyń Qoshmambet aýylynda 1 200 oryn­dyq zamanaýı, ozyq jabdyqtalǵan mektep paıdalanýǵa berildi.

«Keleshek mektepteri» degen ataý bul uıymdardyń mıssııasyn aıqyn kórsetedi. Bul – bar balaǵa teń múmkindik usynatyn bilim oshaqtary», dep túıindedi mınıstr.