Medısınalyq kómektiń biryńǵaı paketi engizilmek

Halyqaralyq kelisimder ratıfıkasııalandy

Qazaqstan men Túrikmenstan ózara ınvestısııalardy qorǵaý­ǵa kelisti. Osy másele týraly Májiliste talqylanǵan zań jobasyn Syrtqy ister mınıstriniń orynbasary Álibek Qýantyrov tanystyrdy. Jalpy otyrys­ta Májilis Qazaqstan Úkimeti men Túrikmenstan Úkimeti ara­syndaǵy ınvestısııalardy ózara kótermeleý jáne qorǵaý týraly kelisimdi ratıfıkasııalady. Kelisimniń maqsaty – ın­vestısııalyq qyzmetke qolaıly jaǵdaı jasaý, tikeleı sheteldik ınvestısııalar aǵynyn yntalandyrý jáne ýaǵdalasýshy el­derdiń ekonomıkalyq ál-aýqa­tyn jaqsartý. Ýaǵdalasýshy taraptardyń kez kelgeniniń ınvestorlary júzege asyrǵan ınvestısııa­lar ádil ári teń quqyly rejim paıdalana­dy. Sondaı-aq ol ekinshi tarap mem­leketiniń aýmaǵynda tolyq qorǵa­lady, qaýipsizdigi qamtamasyz etiledi.

Sondaı-aq aldaǵy ýaqytta Qyrǵyz­stanmen odaqtastyq qarym-qatynas­ty keńeıtýge múmkindik beretin tıisti zań jobasyn Syrtqy ister mınıstriniń birinshi orynbasary Aqan Rahmetýllın tanystyryp, baıan­dama jasady. Bul týraly eki el arasyndaǵy odaqtastyq qaty­nas­tardy tereńdetý jáne keńeıtý týraly shartty ratıfıkasııalaǵan zań jobasynda qarastyrylǵan. Kelisim ekijaqty yntymaq­tastyqty jan-jaqty damytýǵa qosym­sha serpin berip, yntymaq­tastyqtyń keń aýqymyn qamtı­dy. Onyń aıasynda birqatar ekijaqty kelisimder kúshine endi. Ol saıası, ekonomıkalyq, tranzıt-kólik, sý-energetıka jáne aýyl sharýashylyǵy sala­laryndaǵy, onyń ishinde bir­lesken kásiporyndar qurý arqyly azyq-túlik qaýipsizdigin qamtamasyz etýdi, sondaı-aq eki eldiń rýhanı jáne mádenı jaqyndyǵyn nyǵaıtý arqyly yntymaqtastyqty damytýdy kózdeıdi.

Májilis ınnovasııalyq qyz­met salasyn memlekettik qol­daý júıesin jetildirý máselesi tóńiregindegi zań jobasyn osy otyrysta ekinshi oqylymda qabyldady. Zań jobasyn tanys­tyrǵan Ekonomıkalyq reforma jáne óńirlik damý komıtetiniń múshesi Aıtýar Qoshmambetov memlekettik qoldaý qural­daryn ońtaılandyrý úshin Innovasııalyq tehnologııa­lar parki men «Astana Hub» birikti­riletinin málimdedi.

Túzetýler birtutas ınnova­sııalyq klaster qurý jáne onyń qatysýshylaryn qoldaýdy keńeıtý arqyly ınnovasııalyq qyzmet jaǵdaıyn jaqsartýǵa arnalǵan.

«Qazaqstan Respýblıkasynyń keıbir zańnamalyq aktilerine ınnovasııalyq qyzmet salasyn memlekettik qoldaý júıesin jetildirý máseleleri boıynsha óz­gerister men tolyqtyrýlar en­gizý týraly» zań jobasy biryń­ǵaı ınnovasııalyq klaster qurý jáne oǵan qatysýshylar úshin qoldaý­dy keńeıtý arqyly ınnova­sııa­lyq qyzmetke jaǵdaılardy jaq­sar­tý maqsatynda ázirlen­di», dedi Májilis depýtaty A.Qoshmambetov.

MÁMS júıesine ózgeris engizildi

«Qazaqstan Respýblıkasynyń keıbir zańnamalyq aktilerine mindetti áleýmettik medısınalyq saqtandyrý máseleleri boıynsha ózgerister men tolyqtyrýlar engizý týraly» zań jobasyn Áleýmettik-mádenı damý komı­tetiniń múshesi Gúldara Nurym tanystyrdy.

Onyń aıtýynsha, endi elimizde medısınalyq kómektiń biryńǵaı paketi engizilmek. Májilis osy máselege, ıaǵnı mindetti áleýmettik medısınalyq saqtandyrý jáne medısınalyq qyzmet kórsetý máselelerine qatysty zańdy ekinshi oqy­lymda qabyldady. Memleket bas­shy­synyń 2024 jylǵy 2 qyrkúıektegi Joldaýyn iske asyrý maqsatymen Úkimet ázirlegen bul qujat mindetti medı­sınalyq saqtandyrý sala­syndaǵy memlekettik qyz­met­tiń quqyqtyq jáne uıymdas­tyrý­shylyq negizderin jetil­dirýge baǵyttalǵan.

Zań tegin medısınalyq kómek­tiń kepildik berilgen kólemi aıasynda jáne mindetti medı­sınalyq saqtandyrý júıesinde kór­setiletin medısınalyq qyz­met túrlerin ajyrata otyryp, medısınalyq kómektiń biryńǵaı paketin qurýdy usynady.

Depýtat G.Nurym medısı­nalyq qyzmet kórsetý salasyn­daǵy baqylaýdy kúsheıtý jáne qadaǵa­laý­dy engizý boıynsha usynylǵan normalar qyzý talqylanǵanyn atap ótti.

– Depýtattar densaýlyq saqtaý sala­syndaǵy ýákiletti organǵa anyq­talǵan buzýshylyqtarǵa jedel den qoıý sharalaryn qoldaný quqy­ǵymen qadaǵalaý fýnksııa­syn berý usy­nysyn engizdi. Úki­mettiń qory­tyn­dysyna sáıkes, tıisti lısenzııa nemese sertıfıkat bolmaǵan jaǵdaıda qada­ǵalaýdy engizý jónindegi túzetýler qabyldandy, – dedi Gúldara Nurym.

Dese de zań jobasyn tal­qylaý barysynda keıbir usy­nys qoldaý tappady. Sondaı-aq medısınalyq uıymdar MÁMS júıesindegi qar­a­jattyń jumsalýy týraly aqparatty jarııalaýǵa min­detteldi. Túzetý­lermen jumys barysynda depýtattar mindetti áleýmettik medı­sınalyq saq­tan­dyrý júıesinde jarnalardy úzdiksiz tólep kelgen tulǵalardyń jarna tóleýdi toqtatqan sátten bastap alty aıǵa deıin medısınalyq kómek alý quqyǵyn saqtaýdy usyndy.

О́ńir halqynyń ózekti máselelerin jetkizdi

«Amanat» partııasy frak­sııa­synyń múshesi Ulyqbek Tumashınov Premer-mınıstr Oljas Bektenovke joldaǵan saýalynda eldi mekenderdi gazben qam­tamasyz etý máselelerin kóter­di. Depýtat Shyǵys Qazaqstan­da qys mezgili alty jarym aıǵa deıin sozylatyn aıtyp, óńir turǵyndarynyń «gazdandyrý máselesi qashan sheshiledi?» degen basty suraǵyn jetkizdi.

– Bul suraqtyń ózektiligi – keıin­gi jyldary kómir baǵasynyń sharyqtaýymen jáne onyń sapa­synyń syn kótermeýimen baılanysty. Aýyldyq jerler­de kómir baǵasy 30 myń teńgege deıin jetti, al onyń sapasy turǵyn­dardy alańdatyp otyr, – dedi U.Tumashınov.

Ásirese Shyǵys Qazaqstannyń shekara mańyndaǵy aýdandaryn gazben qamtý asa ózekti bolyp otyrǵanyn atap ótti.

– Gaz kenishiniń ústinde otyryp, kógildir otynǵa qol jetkize almaý – Zaısan halqy úshin túsi­niksiz ári ádiletsiz jaǵdaı. Gaz kenishiniń ústinde ornalasqan Zaısan azamattarynyń ashý-yzasyn, muń-muqtajyn estý óte qıyn, – degen depýtat mundaǵy gaz qorynyń azaıyp kele jatqanyn aıtyp, Úkimetke halyqty gazben qamtýdyń balama joldaryn oılastyrý kerektigin usyndy.

Sondaı-aq depýtat Ulasbek Sádibekov saýalyn Premer-mınıstr Oljas Bektenovke baǵyttap, Túrkistan oblysyndaǵy sha­rýalardyń qýańshylyq qys­paǵynda qalǵanyn aıtyp, shy­byn-shirkeılerdiń de eldi ábden ábi­gerge salyp jatqanyn jetkizdi.

– Keıingi jyldary óńir halqyn, ásirese dıqandar men sharýalardy alańdatqan ózek­ti máseleler kóbeıip barady. Atap aıtar bolsam, bıyl shar­ýalar buryn-sońdy bolmaǵan qýańshylyqtyń qyspaǵynda qaldy. Jaıylymnyń qýraýy, mal azyǵynyń tapshylyǵy, egin alqaptarynyń kúıip ketýi el turǵyndarynyń áleýmettik-eko­nomıkalyq jaǵdaıyn qıyn­datyp jiberdi, – degen depýtat qýańshylyq saldarynan sharýalar dándi jáne maıly daqyldardan jos­parlanǵan ónimdi ala almaýy múmkin ekenin de eskertti.

Osylaısha, Úkimet basshysyna qýańshylyqtan zardap shekken aýdandarda tótenshe jaǵdaı rejimin jarııalaý múmkindigin qarastyrýdy jáne qýańshylyq zardaptaryn eńserýge baǵyt­talǵan arnaıy óńirlik baǵdarlama qabyldap, onyń aıasynda ǵylymı negizdelgen agroekologııalyq sheshimderdi júzege asyrýdy usyndy.

Sonymen qatar asa qaýipti zııandy organızmderge qarsy kúres sharalaryn jedel ári tıimdi júzege asyrý úshin óńdeýge jatatyn barlyq jer kólemin respýblıkalyq bıýdjetten 100% qarjylandyrý máselesin kóterdi.