Foto: Ashyq derekkóz
Bes kún ishinde elimizdiń barlyq óńirlerindegi medısınalyq-sanıtarııalyq alǵashqy kómek uıymdary men Jastar densaýlyǵy ortalyqtarynda Ashyq esik kúnderi ótti. Reprodýktıvtik jastaǵy erler men áıelder, jasóspirimder men jastar konsýltasııalyq jáne aqparattyq qoldaý aldy. Sondaı-aq otbasyn josparlaý, áıelderdiń densaýlyǵy, erlerdiń densaýlyǵy, jastar jáne JJBI, APV profılaktıkasy sııaqty jeke taqyryptarǵa arnaldy.
«Aptanyń negizgi qorytyndylaryn shyǵara otyryp, Densaýlyq saqtaý mınıstrliginiń jelisi boıynsha respýblıka kóleminde 14 350 is-shara ótkizilgenin atap ótken jón. Jalpy joba 358 498 qazaqstandyqty qamtydy, olardyń ishinde 83 389 er adam, 157 476 áıel jáne 117 633 jasóspirim bar. Gınekologtar, ýrologtar, ınfeksıonıster jáne basqa da mamandardyń qatysýymen 3 636 aǵartýshylyq kezdesý men dáris ótti», dep habarlady mınıstrliktiń baspasóz qyzmeti.
Aptalyq aıasynda BAQ-ta 238 saraptamalyq pikir, suhbat pen baıandama jarııalanǵan. Halyqtyń eń belsendi qatysýy men qyzyǵýshylyǵy Almaty, Astana qalalarynda, sondaı-aq Aqtóbe, Túrkistan jáne Qaraǵandy oblystarynda baıqalǵan.
Sonymen qatar jasóspirimderge erekshe nazar aýdarylǵan. 117 myńnan astam bala densaýlyq pen aýrýlardyń profılaktıkasy týraly senimdi aqparatqa qol jetkizgen. Dárigerler men mamandar mektepter men kolledjderde ǵana emes, sıfrlyq ortada - áleýmettik jeliler men telearnalar arqyly da jumys júrgizgen.
«Reprodýktıvtik densaýlyq mádenıetin jáne profılaktıkalyq medısınany damytý — bolashaq urpaqtyń densaýlyǵyna qosqan eń mańyzdy úles. Barlyq óńirlerge, medısına qyzmetkerlerine, áriptester men BAQ-qa belsendi qatysqany úshin alǵys bildiremiz. Reprodýktıvtik densaýlyq aptalyǵy — memleket, densaýlyq saqtaý júıesi men qoǵamnyń kúshin biriktiretin jyl saıynǵy bastamaǵa aınalady», dedi QR Densaýlyq saqtaý mınıstri Aqmaral Álnazarova.
