Foto: Ashyq derekkóz
Ekologııa jáne tabıǵı resýrstar mınıstrliginiń habarlaýynsha, ekobot iske qosylǵannan beri túsken 18 myńnan astam ótinimniń 17 myńy sátti oryndalǵan.
«@TazaQazBot-tyń belsendi paıdalanýshylary - Almaty, Shymkent jáne Astana qalalarynyń turǵyndary. Statıstıkaǵa sáıkes, ótinishterdiń basym bóligi aýmaqtardy jınaý, turmystyq qoqystardy shyǵarý, kóshelerdi abattandyrý taqyryptary tóńireginde. Bul platforma joldardy jóndeý, sý aıdyndaryn tazartý jáne kireberisterdiń sanıtarlyq jaǵdaıyn jaqsartý syndy ótinimderdiń 21 sanatyn qamtıdy», delingen habarlamada.
Aıta keteıik, ótinimder sapasyz oryndalǵan jaǵdaıda atalmysh júıede shaǵym berýge bolady. 2025 jyldyń basynan beri 200-den astam shaǵym tirkelgen.
«Elimizdiń barlyq turǵyndaryn kúndelikti ómirde kezdesetin tazalanbaǵan qoqystardan bastap, jaryq qosylmaǵan aýlalar, bitelgen aryqtarǵa deıingi ekologııalyq problemalardy sheshý maqsatynda @TazaQazBot-ty belsendi túrde paıdalanýǵa shaqyramyz», delingen mınıstrlik habarlamasynda.
