AQTAÝ. 6 mamyr. Mańǵystaýda múgedek jandardyń «Damý» qoryna habarlasýy kóbeıgen. Bul týraly egemen.kz tilshisi habarlady.
«Damý» qorynyń Mańǵystaý oblysyndaǵy aımaqtyq fılıalyna kómek kórsetýge ótinish bildirýshi múmkindigi shekteýli jandardyń, sondaı-aq, olarǵa «Damý-Kómek» baǵdarlamasy boıynsha kómek kórsetýshi kásipkerlerdiń sany kún saıyn kóbeıýde. Bıyl sáýir aıynda «KazAzot» kompanııasy birden úsh múmkindigi shekteýli kásipkerge demeýshilik kómegin kórsetti.
Múmkindigi shekteýli úsh kisi, bıznesiniń damýy men jalǵasýyna qoldaý kórsetedi degen úmitpen Mańǵystaý fılıalyna arnaıy kelgen. Olardyń biri – ekinshi top múgedegi, Shetpe selosynyń turǵyny Ý.Ernııazov jeńil kólik satyp alýǵa kishigirim qarjylaı kómek surap, kóligimen jolaýshylardy tasymaldaýdy jáne múmkindigi shekteýli kisilerdi aqysyz jetkizýdi josparlaǵan bolsa, M.Alıgýlov aýyl sharýashylyq bıznesine qajetti noýtbýk alyp berýge ótinish bergen. Sondaı-aq, Munaıly aýdanynyń turǵyny M.Orazovqa qoldanystaǵy sehyna jıhazdar shyǵarý úshin jabdyq alý qajet bolǵan.
Úsh kásipkerge jalpy sommasy 600 myń teńgeni quraıtyn demeýshilik kómekti «KazAzot» kompanııasy kórsetti. Atalǵan kompanııa Qazaqstan boıynsha ammıakty selıtrany óndirýshi jalǵyz kásiporyn. Qaıyrymdylyq isteri úshin kásiporyn basshysy Keńes Oraqovqa «Damý» qory atynan arnaıy alǵys hat tabys etildi.
Mańǵystaý oblysy boıynsha «Damý-Kómek» baǵdarlamasy sheńberinde 46 múgedek-kásipkerlerge demeýshilik kómegi kórsetilgen.
Gúlaıym Shyntemirqyzy.
Derek, sýret: egemen.kz.
