Bıylǵy qańtar aıynda Pavlodar qalasynda taqta aldyna shyqqan oqýshyny matematıka muǵalimi arqasynan úshkir zatpen (burandaly shegemen) túırep ketkeni týraly oqıǵa áleýmettik jeli qoldanýshylaryn shýlatqan edi.
Beınejazbadan baıqaǵanymyzdaı, matematıka pániniń muǵalimi taqtaǵa shyǵyp, tapsyrmany sheship turǵan er balanyń artynan kelip, áldenemen túırep ótedi. Oqýshynyń aýyrsynyp qalǵany baıqalady ári onyń aldynda muǵalimniń shkafqa jaqyndap kelip, odan burandaly shegeni (shýrýp) bosatyp alǵany da kameraǵa túsip qalǵan.
Polısııa qylmystyq is qozǵap, mektep ákimshiligi atalǵan muǵalimmen eńbek shartyn buzyp, jumystan shyǵaryp jibergen edi.
Áleýmettik jeli qoldanýshylary mektep basshylyǵynyń sheshimi durys emes degen baılam jasady. Al mektep ata-analary ustazdy qoldaý úshin qol jınamaq boldy.
Aqyr-sońy pedagog oqýshynyń ata-anasynan keshirim surap, arada eki kún ótkende jumysqa qaıtadan alyndy.
Arada úsh jarym aıdan astam ýaqyt ótkende polısııa istiń sotqa jetpeı doǵarylǵanyn málim etip otyr.
- Atalǵan oqıǵa boıynsha sotqa deıingi tergeý sharalary aıaqtalyp, is toqtatyldy. Materıaldar óndirisinde bul istiń quramynda qylmystyq zań buzýshylyqtyń joq ekeni anyqtaldy. Kámeletke tolmaǵan er balaǵa dene jaraqatyn keltirýdiń qandaı da bir derekteri anyqtalmaǵany sot-medısınalyq saraptamanyń qorytyndysymen, kámeletke tolmaǵandy kýálandyrýdy júrgizgen sarapshynyń jaýap alý hattamasymen jáne kabınetten túsirilgen beınejazba arqyly rastaldy,-dep habarlady óńirlik polısııa departamentiniń baspasóz qyzmetinen.
