Oralda polıseıler jergilikti azamatty órtten qutqaryp qaldy

ORAL. 5 mamyr. Oral qalalyq ishki ister bóliminiń qyzmetkerleri Muhıt Ábilhaıyrov pen Jeńis Ámiruly jergilikti azamatty órtten arashalap qaldy. Bul týraly Batys Qazaqstan oblystyq ishki ister departamentiniń baspasóz qyzmeti habarlady. Oqıǵa 30 sáýirden 1 mamyrǵa qaraǵan túnde bolǵan. Aǵa leıtenant Muhıt Ábilhaıyrov bastaǵan polısııa qyzmetkerleri «Nan zaýyty» mańaıynda bir er adamnyń «órtten qutqaryńdar! ishte adam qalyp qoıdy» dep aıqaılaǵanyn estıdi. «Kók tútin úıdiń ekinshi qabatynan shyǵyp jatqanyn baıqadyq. Temir esik qulyptaýly. Sol sebepten ishke balkon arqyly kirýge árekettendim. Terezeni rasııamen syndyryp kirgen boıda páter ishinde kiltin izdep, talyqsyp jatqan er adamdy kórdim. Kóp keshikpeı qalalyq ishki ister bóliminiń 502-shi ekıpajy kómekke keldi. Sol sátte polısııa starshınasy Jeńis Ámiruly menimen birge qutqarý operasııasyna jedel kirisip ketti. Qalǵan qyzmetkerler zardap shegýshini balkon arqyly túsirýge kómektesti», – deıdi Muhıt. Jedel qımyldaǵan tártip saqshylary otqa oranǵan úıdiń turǵyndaryn evakýasııalaý kezinde órt sóndirýshiler de kelip jetti. Temir Qusaıyn. Derek: Batys Qazaqstan oblystyq ishki ister departamentiniń baspasóz qyzmeti. Sýret: uralskweek.kz.