Foto: alrt.kz
Qazaqstan Respýblıkasynyń Bas prokýratýrasy Túrkııada ustalǵan «Astana LRT» kompanııasynyń burynǵy basshysy Talǵat Ardandy ekstradısııalaý máselesine baılanysty túsinikteme berdi.
Vedomstvo Talǵat Ardanǵa «Senip tapsyrylǵan bóten múlikti ıemdený nemese ysyrap etý» jáne «Laýazymdyq ókilettikterdi teris paıdalaný» baptary boıynsha qylmystyq is qozǵalyp, onyń Sybaılas jemqorlyqqa qarsy qyzmetpen izdeýde júrgenin túsindirdi. Oǵan qatysty bultartpaý sharasy retinde qamaýǵa alý sheshimi qabyldanǵan. Talǵat Ardan halyqaralyq izdeýde bolǵan.
Resmı aqparatqa sáıkes, 2025 jylǵy 10 mamyrda Interpoldyń Ulttyq ortalyq bıýrosy arqyly Ardannyń Túrkııa aýmaǵynda ustalyp, Antalııadaǵy túzeý mekemesine jetkizilgeni týraly habar kelip túsken.
«Qazirgi ýaqytta QR Bas prokýratýrasy Talǵat Ardandy ekstradısııalaý úshin barlyq qajetti qujattardy Túrkııa Respýblıkasynyń quzyrly organdaryna joldady. Qazir ony ekstradısııalaý máselesi túrik tarapymen qaralyp jatyr», delingen Bas prokýratýranyń habarlamasynda.
Eske sala keteıik, 2025 jylǵy 13 mamyrda Qazaqstannyń Ulttyq qaýipsizdik komıteti «Astana LRT» kompanııasynyń burynǵy basshysy Talǵat Ardannyń Túrkııanyń Antalııa qalasynda ustalǵanyn habarlaǵan bolatyn. Sol kezde belgili bolǵandaı, QR Bas prokýratýrasy Talǵat Ardandy halyqaralyq izdeýge jarııalap, ony 2019 jyly ekstradısııalaý týraly Túrkııanyń Ádilet mınıstrligine ótinish jibergen.
Osyǵan baılanysty Túrkııanyń quzyrly organdary izdestirý sharalaryn júrgizgen.
«Bıyl Ulttyq qaýipsizdik komıteti Talǵat Ardannyń naqty júrgen jerin anyqtady. Osydan keıin Túrkııanyń quqyq qorǵaý organdary ony Antalııada ustady. 9 mamyr kúni Antalııa soty Talǵat Ardandy Qazaqstanǵa deportasııalaý týraly sheshim shyǵardy, qazirgi tańda ol qamaýda», dep habarlady QR UQK 2025 jylǵy 13 mamyrda.
Aıta keteıik, 2023 jyldyń mamyr aıynda Astananyń qylmystyq ister jónindegi mamandandyrylǵan aýdanaralyq soty LRT isi boıynsha aıyptalýshylar Talǵat Ardan men Qanat Sultanbekovke syrttaı úkim shyǵarǵan bolatyn.
Talǵat Ardan «Astana LRT» kompanııasyn 2014 pen 2017 jyldar aralyǵynda basqarǵan. Antıkor málimetinshe, ol urlyq faktisi áshkerelenbeı turyp, elden ketip qalǵan.
Sondaı-aq quqyq qorǵaý organdary bul qylmystyq shemany Astana qalasy ákiminiń burynǵy orynbasary Sultanbekov pen kompanııanyń burynǵy basshysy Ardan sheteldik jáne qazaqstandyq kompanııalardyń kómegimen uıymdastyrǵanyn málimdedi.
