Foto: О́nerkásip jáne qurylys mınıstrligi
Aıta ketelik, qurylys salasy elimizdiń ekonomıkasynyń negizgi salalarynyń biri.
«2024 jyly respýblıka kóleminde 170 myńnan astam turǵyn úı paıdalanýǵa berildi. Memlekettik ınvestısııalar arqyly 30 myńnan asa páter salyndy, sondaı-aq 9 myńǵa jýyq jeńildetilgen zaım berildi. Bıylǵy jyly da turǵyn úı salýdy jalǵastyrý jáne azamattardy turǵyn úımen qamtamasyz etýdiń qosymsha sharalaryn engizý josparlanǵan. Sonyń aıasynda kredıttik baǵdarlamamen 12 myń páter salý jáne 5 myńnan astam jalǵa beriletin turǵyn úı satyp alý kózdelip otyr», atap ótti B.Júnisbekov.
Qazirgi ýaqytta elimizde turǵyn úı kezeginde 650 myńnan astam adam bar. Bul azamattarǵa jalǵa beriletin turǵyn úı satyp alý quqyǵymen beriledi, onyń keminde 20%-y jetim balalarǵa tıesili.
2022 jyldan bastap turǵyn úıdi jaldaý qunynyń 50%-yn sýbsıdııalaý engizildi, bul birinshi jáne ekinshi toptaǵy múgedekter, jetim balalar, kópbalaly otbasylar sııaqty toptarǵa baǵyttalǵan. Búginde 11 myńǵa jýyq otbasy turǵyn úıdi jalǵa alý boıynsha memlekettik qoldaý alady.
О́nerkásip jáne qurylys mınıstrliginiń baspasóz qyzmetiniń málimdeýinshe ákimdikter turǵyn úı sertıfıkattary arqyly ıpotekalyq nesıelerdiń bastapqy jarnasyn jabýǵa kómektesedi. О́tken jyly 2300-den astam, al bıylǵy jyldyń alǵashqy toqsanynda 500-den astam sertıfıkat berilgen.
Turǵyn úı jaǵdaıyn jaqsartýǵa memlekettik qoldaýdyń qosymsha sharasy – jeńildetilgen ıpotekalyq nesıeler berý. Kezekte turǵan azamattarǵa 2% jáne 5% mólsherlemesi boıynsha zaımdar beriledi. 2024 jyly 3800-den astam adam jeńildetilgen zaım alsa, bıylǵy tórt aıda 950-den astam adam turǵyn úı satyp alý úshin zaım aldy.
«Naýryz» ıpotekalyq baǵdarlamasy aıasynda áleýmettik osal toptar úshin jyl saıyn 12 myń zaım berilý josparlanǵan, al bıylǵy tórt aıda 1 500-den astam adam bul baǵdarlamanyń artyqshylyǵyn paıdalandy.
Sondaı-aq, turǵyn úı saıasatyn reformalaýǵa baǵyttalǵan zańnamaǵa da túzetýler engizildi. Endi turǵyn úı kezekke tirkelgen kúni men otbasynyń tabys deńgeıin eskere otyryp bólinetin bolady.
