Bul naýqan Mádenıet jáne aqparat, Densaýlyq saqtaý, Oqý-aǵartý, Ǵylym jáne joǵary bilim mınıstrlikteriniń, sondaı-aq halyqaralyq uıymdardyń – BUU Halyq qonystanýy qory (IýNFPA), Dúnıejúzilik densaýlyq saqtaý uıymy (DDSU), IýNESKO - jáne qazaqstandyq úkimettik emes uıymdardyń, sonyń ishinde KAPM, Saulyq LIFE, YPEER jáne basqalardyń qoldaýymen júzege asyryldy.
Bes kún boıy elimizdiń barlyq óńirinde birizdendirilgen aqparattyq-aǵartýshylyq kampanııa júrgizildi. Ár kúnge jekelegen taqyryp arnaldy: otbasyn josparlaýdan bastap, jasóspirimderge arnalǵan reprodýktıvti bilim berý, APV, JJBI aldyn alý jáne erler densaýlyǵyn saqtaý máselelerine deıin.
Dóńgelek ústel barysynda Aptalyqtyń qorytyndylary shyǵarylyp, reprodýktıvti densaýlyq salasyndaǵy memlekettik saıasatty jetildirýge arnalǵan usynystar aıtyldy. Bul – bolashaq urpaqtyń ál-aýqatyna tikeleı áser etetin mańyzdy baǵyt. Kampanııa seriktesteriniń usynystary men usynymdaryn jınaýǵa erekshe kóńil bólindi. Bul materıaldar jınaqtalyp, Ulttyq komıssııa otyrysynda usynylady.
Kampanııanyń negizgi nátıjeleri: 20 myńnan astam is-shara ótkizildi (2024 jylmen salystyrǵanda 2 ese kóp); jalpy qamtylý – shamamen 500 myń adam, onyń ishinde 240 myńnan astamy – jasóspirimder men jastar; 80 myńǵa jýyq tegin keńes berildi, 8,4 myńnan astam JJBI jáne AITV-ǵa testileý júrgizildi; áleýmettik jelilerde 359 myńnan astam jazba jarııalandy, BAQ-ta 1,5 myńnan astam materıal jaryq kórdi; aqparattyq beınerolıkter elimiz boıynsha 627 LED-ekranda kórsetildi.
Aptalyqtyń ár kúni naqty taqyrypqa arnaldy – otbasyn josparlaý, jasóspirimderdiń reprodýktıvti saýatyn arttyrý, APV, JJBI aldyn alý jáne erler densaýlyǵy. Mundaı tásil maqsatty toptarmen júıeli, baǵyttalǵan ári salalar arasyndaǵy úılesimdi kommýnıkasııany ornatýǵa múmkindik berdi.
Ulttyq komıssııa tóraǵasynyń orynbasary Juldyzaı Ysqaqova tóraǵa atynan sóılep, bastamaǵa úles qosqan barlyq seriktester men qatysýshylarǵa alǵysyn bildirdi:
- «Reprodýktıvti densaýlyqqa qamqorlyq mádenıetin qalyptastyrý – bir rettik aksııa emes, turaqtylyqty, úılestirýdi jáne jan-jaqty qatysýdy talap etetin strategııalyq mindet. Osyndaı bastamalar kúshterimizdi biriktirýge, úzdik tájirıbelerdi keńinen engizýge jáne qoǵamdaǵy minez-qulyq pen kózqarasty naqty ózgertýge jol ashady», – dedi ol.
Talqylaýǵa QR Parlamenti Senatynyń depýtaty Aınur Arǵynbekova, QR Densaýlyq saqtaý mınıstrliginiń ókili Shakıhzat Halyqova, Ulttyq komıssııa músheleri, óńirlik densaýlyq saqtaý basqarmalarynyń ókilderi, halyqaralyq uıymdar, zertteý jáne sarapshylyq qaýymdastyq qatysty.
