«Memleket basshysynyń tapsyrmasy boıynsha kınematografııa salasynda aýqymdy jumystar bastaldy. «Qazaqfılm» kınostýdııasyn nyǵaıtý jáne konkýrs ótkizý júıesiniń ashyqtyǵyn arttyrý maqsatynda zańnama jetildirilip, on jyldyq damý strategııasy ázirlenip jatyr. 2024 jyly ulttyq fılmderdi memlekettik qarjylandyrýdyń tıimdiligin, ashyqtyǵyn jáne rentabeldiligin qamtamasyz etý úshin kınojobalardy konkýrstyq irikteý tásilderi ózgertildi. Jyl basynda Kıno ortalyǵy basym taqyryptardy jarııalap – onyń ishinde otansúıgishtikke, adamgershilikke, rýhanııat pen mádenıetke tárbıeleıtin tarıhı fılmderge basymdyq beriledi. Saraptamalyq keńes endi oıyn, anımasııalyq, derekti jáne hronıkalyq fılmder boıynsha jeke seksııalar túrinde jumys isteıdi. Konkýrs eki kezeńnen turady, qujat tapsyrý rásimi jeńildetildi», dedi kınematografııa basqarmasynyń basshysy.
Brıfıngte Ǵanı Muratov prokat jáne dıstrıbýsııa máselesine de toqtaldy.
«О́ndirisi aıaqtalyp, prokatqa arnalǵan 54 kórkem fılmniń 34-i ekranǵa shyqty. 2024 jyldyń ózinde 5 ulttyq fılm keń prokatqa shyǵyp, jyl sońyna deıin taǵy 10 fılm kórermenge jol tartady. Búginde 2025 jylǵa arnalǵan jańa konkýrs jarııalandy. Memlekettik qoldaý birinshi kezekte kommersııalyq tabysqa emes, fılmderdiń sapasy men áleýmettik-aǵartýshylyq mıssııasyna baǵyttalǵan. Basym baǵyttarǵa jas rejısserlerdi (qysqametrajdy fılmderge deıin), avtorlyq jáne derekti kınony, sondaı-aq anımasııany qoldaý kiredi», dedi ol.
«Qazaqfılm» kınostýdııasy málimetinshe, 2024 jyly «Qazaqfılm» keıingi 7 jylda alǵash ret ózin-ózi aqtaıtyn uıymǵa aınalǵan. 15 jyldan beri alǵash ret kınostýdııada demeýshiler esebinen kosmetıkalyq jóndeý jumystary bastalypty. Sonymen qatar kınostýdııa fılmderdi dıstrıbýsııalaý jáne kóbeıtý, Altyn qordaǵy fılmderdi sıfrlyq restavrasııalaý, shetelde Qazaq kınosy kúnderin ótkizý, «Qazaqanımasııa» shyǵarmashylyq birlestiginiń jumysyn qamtamasyz etý boıynsha memlekettik qoldaý alady. Byltyr kınostýdııaǵa 903,2 mln teńge bólinse, bıyl 926,7 mln teńge qarastyrylǵan.
Sondaı-aq spıker «Qazaq anımasııa» bóliminiń Astanaǵa kóshýine baılanysty da pikir bildirdi. «Bárimiz biletindeı, ınnovasııalyq tehnologııalardy engizý jáne kreatıvti jobalardy qarjylandyrý úderisteri elordada belsendi júrip jatyr. Astanada jyl saıyn TMD elderiniń gık-mádenıet festıvali – «Comic Con» ótedi, Kreatıv ındýstrııalar qory ashylmaq. Sondaı-aq, elordada «Habar», «Qazaqstan», balalar men jasóspirimderge arnalǵan jalǵyz memlekettik arna – «Balapan» sııaqty iri telearnalar ornalasqan. «Qazaq anımasııa» osy ınfraqurylym men resýrstardy tıimdi paıdalanyp, anımasııa salasyn damytýǵa tıis», deıdi Ǵanı Muratov.
«Qazaqfılm» Ulttyq kınostýdııasy prezıdentiniń mindetin ýaqytsha atqarýshy Aıdar Omarov mekemeniń aǵymdyq jumystary jóninde baıandady.
Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı ssenarıı qabyldaýdaǵy baıqaý barysyna, ótkizilý tártibine, ádiletsizdik jibermeýge tyrysyp baǵatyny týraly aıtty. Ol turǵyda jumys meılinshe jeńildetilgen jáne alalaý joq kórinedi.
«Jıi talqylanatyn másele – qazaq kınosy qashan damıdy degen suraq. Bárimizdi alańdatatyn másele. Statıstıkaǵa kóz júgirtsek, 2019 jyldan beri mınıstrlik pen Kıno ortalyǵynyń qoldaýymen 117 joba júzege asty. Onyń 55-i – tolyqmetrajdy fılm. Sol 55 fılmniń 40-y búginge deıin prokatqa shyqty. Biraq kórermen sol kınony tamashalady ma, joq pa – bul basqa áńgime. Mysaly, ótken jyly túsirilimi 2019 jyly bastalǵan úsh iri joba ekranǵa shyqty. Olar – «Qajymuqan», «Jańa dáýir», «Ahmet. Sońǵy kún». Bul – aýqymdy jobalar. Mundaı kartınalar – ultqa qyzmet etetin, óskeleń urpaqtyń tárbıesine áser etetin týyndylar. Sondyqtan bul fılmderge bólinetin qarajatty ınvestısııa emes, memlekettik grant retinde usynamyz. Iаǵnı «nege aqsha qaıtpaı jatyr?» dep suramaımyz. Kıno túsirilgennen keıin biz sol kompanııaǵa lısenzııalyq quqyq beremiz. Olar sol quqyqpen festıvaldarǵa qatysady, prokatqa shyǵarady. Al prokattaǵy tabystyń 80 paıyzy sol kompanııanyń enshisine tıesili bolady. Bul degenimiz — memleket kıno túsirýge aqsha bóledi, biraq odan qaıtarym talap etpeıdi degen sóz. Bul memleket tarapynan jasalyp otyrǵan úlken múmkindik emes pe?», dedi Qurmanbek Jumaǵalı.
