Aǵymdaǵy jyldyń alǵashqy tórt aıynda óndiris kólemi 45 628 birlikti qurady – bul ótken jyldyń sáıkes kezeńimen salystyrǵanda (22 583 birlik) eki esege jýyq artyq. Qazirde elimizde avtokólik óndiretin segiz iri kásiporyn: Qostanaı qalasyndaǵy «SaryarqaAvtoProm» JShS (Allur), Saran qalasyndaǵy «QazTehna» JShS, Almaty qalasyndaǵy «Hyundai Trans Kazakhstan» JShS jáne «Hyundai Trans Auto» JShS, Semeı qalasyndaǵy «SemAZ» JShS jáne «Daewoo Bus Kazakhstan» JShS, Kókshetaý qalasyndaǵy «KamAZ-Injınırıng» AQ, jáne Oral qalasyndaǵy «Ýralskagroremmash» AQ jumys isteıdi.
Salada avtokomponenttik bazaǵa erekshe kóńil bólinýde. О́tken jyly Saran qalasynda Tengri Tyres shına zaýyty, Almatyda Kazakhstan Mobility Engineering zaýyty (mýltımedııalyq júıeler óndirisi) jáne Almaty Autoparts Production zaýyty (avtooryndyqtar óndirisi) iske qosyldy. «QazTehna» JShS shanaq bólshekterin shtamptaıtyn jabdyqty jetkizýge kelisimshart jasasa, «Qarmet» AQ bazasynda avtokólik bolatyn shyǵarý josparlanyp otyr. Bul jobalar júzdegen jańa jumys ornyn ashýǵa múmkindik berip, salanyń tehnologııalyq áleýetin arttyrmaq.
Sol sekildi qazirgi sátte Jetisý oblysyndaǵy «Qaınar-AKB» JShS shyǵarǵan akkýmýlıatorlar belsendi qoldanylyp, Hyundai qurastyrý jelilerinde synaqtan ótip jatyr, al bolashaqta Kia kólikterine de qoldanylýy múmkin. «SaryarqaAvtoProm» zaýytynda otandyq komponentter – «Vektor Pavlodar» JShS óndirgen quıma dıskiler men Tengri Tyres shınalary sátti qoldanylýda. Sonymen qatar Hyundai Trans Kazakhstan jáne Allur óndiristik jelileri jańǵyrtylyp, robottandyrylǵan júıeler engizildi, dánekerleý, syrlaý jáne qurastyrý ýchaskeleri jańartyldy.
Oqshaýlaý deńgeıin arttyrý maqsatynda «SaryarqaAvtoProm» eki iri avtokomponenttik óndiris ortalyǵyn qurý jobasyn iske asyryp jatyr. «Tehnopark.kz» JShS bazasyndaǵy 1-shi Lokalızasııalaý ortalyǵy jalpy 30 000 sharshy metr aýmaqty qamtysa, «ProProduction» JShS bazasyndaǵy 2-shi Lokalızasııalaý ortalyǵy 25 000 sharshy metrge oryn tepken. Bul óndiristik alańdarda ınterer men ekstererge arnalǵan plastıkalyq bólshekter, salonnyń ishki sándik árleýi, dybys óshirgish, elektr symdary, oryndyqtar, germetık, mastıka jáne shyǵarý júıeleri óndiriletin bolady. Ortalyqtardyń iske qosylýy ımportqa táýeldilikti azaıtyp, Qazaqstannyń avtokólik ónerkásibindegi pozısııasyn nyǵaıtýǵa septigin tıgizedi.
Memleket sala damýyn normatıvtik-quqyqtyq bazany jetildirý, tarıftik jáne beıtarıftik yntalandyrý sharalaryn engizý, sondaı-aq kooperasııalyq baılanystardy nyǵaıtý baǵytyndaǵy júıeli jumystarmen udaıy qoldap otyr. 2010-2020 jyldary júzege asqan ónerkásiptik jınaqtaý týraly kelisimder aıasynda qazaqstandyq avtozaýyttar dánekerleý men syrlaý prosesterin jolǵa qoıyp, joǵary deńgeıdegi lokalızasııany jáne salanyń tehnologııalyq jetilýin kórsetti.
