Foto: ashyq derekkóz
Avtonesıelerge degen suranystyń ósýi avtosalondarmen birlesken seriktestik baǵdarlamalarmen baılanysty. Bul baǵdarlamalar aıasynda avtonesıeler jartylaı sýbsıdııalanyp keledi. Sonyń nátıjesinde, 2025 jyldyń alǵashqy toqsanynda avtonesıeleýge berilgen ótinimder sany bir jyl ishinde 13%-ǵa ósip, 1,4 mıllıonǵa jetti. Ortasha nesıe somasy da 11%-ǵa artyp, 7,9 mıllıon teńgeni qurady.
Kepilmen beriletin tutynýshylyq nesıelerge de qyzyǵýshylyq joǵarylaǵan. Bul – bankterdiń syıaqy mólsherlemelerin tómendetýi, keıbir komıssııalardy alyp tastaýy jáne jarnamalyq belsendiliktiń artýymen baılanysty. Bul baǵytta ótinimder sany 25%-ǵa artyp, 50,9 myńǵa, al ortasha nesıe somasy 9%-ǵa ósip, 12,8 mıllıon teńgege jetti.
Al ıpotekalyq jáne kepilsiz tutynýshylyq nesıelerge suranys tómendep otyr. Ipotekaǵa degen qyzyǵýshylyqtyń azaıýy memlekettik turǵyn úı jınaǵyna beriletin syıaqynyń keshiktirilýine baılanysty. Osy sebeppen kóp adam ótinim berýdi toqsan sońyna qaldyrǵan. Bul segmentte ótinimder sany 6%-ǵa ósip, 241 myńǵa jetkenimen, ortasha nesıe somasy 7%-ǵa tómendep, 16,6 mıllıon teńgeni qurady.
Kepilsiz tutynýshylyq nesıelerge qyzyǵýshylyqtyń azaıýyna bankterdiń taýarlyq nesıeleýdi ýaqytsha toqtatýy men jarnamadan bas tartýy áser etti. О́tinimder sany 10%-ǵa azaıyp, 18,1 mıllıondy qurasa, ortasha nesıe somasy 13%-ǵa artyp, 1 mıllıon teńgege jetti.
Ulttyq bank derekterine súıensek:
· Avtonesıelerdi maquldaý deńgeıi – 16% (2 paıyzdyq tarmaqqa tómendedi);
· Ipoteka boıynsha maquldaý – 24% (7 paıyzdyq tarmaqqa tómendedi);
· Kepilsiz nesıeler maquldanýy – 31% (ósim bar);
· Kepildi nesıeler maquldanýy – 36% (ózine tán deńgeıde qaldy).
Bank sektoryndaǵy boljamdar boıynsha, avtonesıelerge suranys aldaǵy toqsanda da artady. Ipoteka birtindep jandanýy múmkin, al kepilsiz nesıeler azdap tómendeýi yqtımal.
Janel TО́LEÝBEKOVA, EUÝ 2 kýrs stýdenti
