Baızaq aýdanynda ótken is-sharada ulttyq sport túrleri men salt-dástúr dáriptelip, kitaphanalar men mýzeılerdiń kórmesi, teatrlandyrylǵan qoıylym kópshilik nazaryna usynyldy. Oblys ákimi mádenıet pen óner salasynda eńbek etip júrgen 4 myńǵa jýyq azamattyń ult rýhanııatynyń damýyna qosqan úlesin atap ótip, olarǵa shynaıy rızashylyǵyn jetkizdi.
«Memleket basshysy Qasym-Jomart Toqaev atap ótkendeı, mádenıet pen ónerdiń aǵartýshylyq áleýeti orasan zor. Bul sala ult sanasyn jańǵyrtýǵa erekshe yqpal etedi.
Búgingi tańda elimizdiń mádenı ómirine serpin beretin mańyzdy bastamalar júzege asyrylyp keledi. О́ńirde de ulttyq rýhty jańǵyrtýǵa, jas urpaqqa ónegeli tárbıe berýge baǵyttylǵan aýqymdy is-sharalar uıymdastyrylýda.
2024 jyly 8 mádenıet nysany el ıgiligine berildi. Osy jyly 16 mádenıet nysanynyń qurylysy júrgizilýde.
Bul – mádenıetimizdi damytýǵa, eldi mekenderde óner men rýhanııatty qoljetimdi etýge baǵyttalǵan naqty qadam. Árbir nysan – turǵyndardyń shyǵarmashylyq áleýetin arttyryp, aımaqtyń mádenı kelbetin aıshyqtaı túsetini sózsiz, – dedi oblys ákimi.
Saltanatty is-shara barysynda mádenıet jáne óner salasynyń birqatar qyzmetkeri sala damýyna qosqan eleýli úlesi úshin marapattalyp, qarjylaı sertıfıkatqa ıe boldy. Memleket basshysynyń Jarlyǵyna sáıkes A. Toqpanov atyndaǵy Jambyl oblystyq qazaq drama teatrynyń ártisi Maıra Álimbetova «Qurmet» ordenimen nagradtaldy. Kásibı ánshi Qaharman Ilııasqa QR Prezıdentiniń Alǵys haty men «Altyn Barys» belgisi tapsyryldy.
