Foto: ashyq derekkóz
Elimizde erkin kúresten básekelestik óte kúshti. Elorda tórinde ótken jarysta soǵan taǵy bir kóz jetkizdik. Máselen, osy kúnge deıin 125 kg salmaq dárejesiniń bas balýany sanalyp kelgen Iýsýp Batyrmurzaev shırek fınalda Álisher Erǵalıden oısyraı utyldy. Sóz joq, Álisher myqty balýan. Ol Azııa chempıonatynda tórt ret jeńis tuǵyryna kóterilip, Tokıo men Parıj Olımpıadalaryna qatysty. Biraq Jambyl oblysynyń ókili bul tabystarǵa 97 kg salmaqta qol jetkizdi. Al asa aýyr salmaqtyń óz myqtylary bar. Soǵan qaramastan Á.Erǵalı Batyrmurzaevty qos jaýyrynymen jerge qadady. Fınalda ol aqmolalyq Nursultan Azovtan aılasyn asyrdy. Úshinshi orynǵa Qaraǵandy oblysynyń qos alyby – Serik Baqythanov pen Álıhan Qusaınov taban tiredi.
Álem chempıonatynyń qola, Azııa oıyndarynyń kúmis júldegeri, qurlyqtyń eki dúrkin chempıony Danııar Qaısanov birden eki salmaq dárejesine joǵarlaýdy jón kórgen eken. Biraq onyń bul sheshimi durys bolmaǵynyn báseke barysynda anyq baıqadyq. 86 kg salmaqta saıysqa túsken ataqty balýan alǵashqy aınalymnan keıin-aq kórermender qataryna qosyldy. Danııar Bıbarys Nurylaulyna jol berdi. Aqtóbeniń sportshysy almatylyq Nursultan Abdihalyqpen birge qola medaldi qanaǵat tutsa, altyn jáne kúmis medaldi Bolat Saqaev (Atyraý) pen Nurjan Isaǵalıev (BQO) ıelendi.
57 kg salmaqtyń úzdigi, Azııanyń úsh dúrkin júldegeri, jambyldyq Rahat Qaljanovtyń bul joly júldegerler qatarynan kórinýge qarym-qabileti jetpedi. Ol oıda-joqta óziniń komandalyq áriptesi Ádilet Álmuhamedovke jol berdi. Ádilet altyn aldy. Fınalda ol Abzal О́kenovti (Astana) súrindirdi. Odan keıingi oryndarda – Vagıf Gasanov (Almaty oblysy) pen Dáýlet Ámirhan (BQO).
65 kg salmaqta Nachyn Kýýlar top jardy. Ol Shymkent qalasynyń atynan synǵa túsip júrgenimen taza legıoner. Týǵan jeri – Tyva. Jasy da 30-ǵa taıap qalǵan. Byltyr ony bizdiń bapkerler Ammandaǵy Azııa chempıonatyna apardy. Ol jaqta Kýýlar oısyraı utyldy. Osy oraıda, «Qurlyqtyq deńgeıdegi dodalarda júlde alýǵa jaramaıtyn jigitti Qazaqstanǵa ákelýdiń ne qajeti bar?» degen saýal týyndaıdy. Alaıda bul suraǵymyzǵa jaýap beretin adam tappadyq. Astanada Nachyn aldyna jan salmady. Fınalda kelimsek Meırambek Qartbaıdy (Aqtóbe) bir ǵana upaı aıyrmashylyǵymen utty. Bekzat Sybanbaı (ShQO) men Sherhan Ábil (Almaty) úzdik úshtikti túıindedi. 97 kg salmaqta Bekzat Úrkimbaıǵa (Astana) teń keler eshkim tabylmady. Aqtyq básekede ol Rýstam Ekajevty (Astana) eńserdi. Nurdáýlet Bekenov (ShQO) pen Ákejan Aıtbekov (Jetisý) qola medal buıyrdy.
Kelesi kúni taǵy bes salmaq dárejesi boıynsha jeńimpazdar men júldegerler anyqtaldy. 61 kg salmaqta Ádil Ospanov (Qaraǵandy) ozdy. Sheshýshi saıysta ol Asyl Aıtaqynnan (Almaty oblysy) aılasyn asyrdy. 70 kg salmaqtyń fınalynda Maııs Álıev (Mańǵystaý) Meıirjan Áshirovten (Jambyl) basym tústi. Bul básekeniń taǵdyryn bir ǵana upaı sheshti. 74 kg salmaqta Álibek Ábdiqasymovtyń (Almaty oblysy) asyǵy alshysynan tústi. 79 kg salmaqtyń bas júldesin 27 jastaǵy Dáýlet Ergesh (Jambyl) pen 38 jastaǵy Nurlan Bekjanov (Astana) ózara sarapqa saldy. Jastar arasyndaǵy álem birinshiliginiń kúmis júldegeri eresekter arasyndaǵy álem chempıonatynyń fınalısin utty. 92 kg salmaqta Azamat Dáýletbekovtiń (ShQO) asyǵy alshysynan tústi. Qazaqtyń ataqty balýany fınalda Samır Dýrsýnovqa adym ashtyrmaı, aıqyn basymdyqpen utty.
Jalpy komandalyq esepte Jambyl oblysynyń jampozdary aldaryna jan salmady. Almaty qalasynyń apaıtósteri ekinshi oryn alsa, úzdik úshtikti Shyǵys Qazaqstan oblysynyń balýandary túıindedi.
