ASTANA. 21 maýsym. Búgin Búkilálemdik boks serııasynyń (WSB) besinshi maýsymy aıaqtaldy. Astanada ótken fınaldyq básekede «Astana arlandary» men «Kýba domadores» komandalary kúsh synasty. Keshe birinshi jarys kúninde «arlandar» 3:2 esebimen basym túsken bolatyn. Búgingi ekinshi saıys kúninde de bizdiń komandanyń paıdasyna dál sondaı esep tirkeldi. Nátıjesinde «Astana arlandary» 6:4 esebimen jeńiske jetip, WSB jobasynyń eki dúrkin chempıony atandy. Bul týraly egemen.kz habarlady.
Búgingi boks keshi 52 kıloǵa deıingi salmaq dárejesindegi boksshylardyń jekpe-jegimen bastaldy. «Arlandardyń» jattyqtyrýshylar quramy bul salmaqta Oljas Sáttibaevqa senim artsa, Kýbanyń namysyn Iosvanı Veıtıa qorǵady. Atalǵan synda Oljastyń mereıi ústem bolyp, 3:0 esebimen jeńiske jetti. Dál osyndaı eseppen, Aslanbek Shymbergenov (69 kg.) pen Ivan Dychko da (+91 kg.) qarsylastaryn tize búktirdi.
Al 60 kıloǵa deıin salmaqta baq synaǵan Zakır Safıýllın Lasaro Alvareske 1:2 esebimen ese jiberdi. Sondaı-aq, 81 kıloda judyryqtasqan Nurdáýlet Jarmanov eki dúrkin álem chempıony Hýlıo Sesar la Krýsten 0:3 esebimen jeńildi.
Eki kúnniń qorytyndysy boıynsha, «arlandardyń» paıdasyna 6:4 esebi tirkeldi. Osylaısha, Qazaqstannyń komandasy WSB jobasynda eki dúrkin chempıon atanǵan tuńǵysh klýb retinde hatqa tústi. Buǵan deıin bizdiń boksshylar 2012-2013 jylǵy maýsymda jeńiske jetkeni belgili. Al atalǵan jobaǵa byltyr ǵana qosylǵan kýbalyqtar osymen ekinshi ret fınalda óner kórsetti. О́tken jyly chempıondyq ataqqa qol jetkizse, bıyl kúmis júldeni enshiledi.
«Astana arlandary» – «Kýba domadores» 6:4
Birinshi kún: 49 kg.: Temirtas Júsipov – Ioanıs Oskar Argılagos 3:0 (50:45, 50:45, 50:45); 56 kg.: Qaırat Eralıev – Robeısı Ramıres 0:3 64 kg.: Samat Báshenov – Iаsnıer Toledo Lopes 3:0 (48:47, 48:47, 48:47); 75 kg.: Meıirim Nursultanov – Arlen Lopes Kardona 3:0 (48:47, 48:47, 48:47); 91 kg.: Vasılıı Levın – Erıslandı Savon Kotılla 1:2 (47:48, 47:48, 49:46). Ekinshi kún: 52 kg.: Oljas Sáttibaev – Iosvanı Veıtıa Soto 3:0 (49:46, 49:46, 49:46); 60 kg.: Zakır Safıýllın – Lasaro Alvares 1:2 (46:49, 46:49, 48:47); 69 kg.: Aslanbek Shymbergenov – Ronıel Iglesıas Sotolongo 3:0 (48:47, 48:47, 50:45); 81 keli: Nurdáýlet Jarmanov – Hýlıo Sesar la Krýs 0:3 (46:49, 45:50, 45:50); + 91 keli: Ivan Dychko – Iohandı Toırak Ortega 3:0 (50:45, 50:45, 50:45). Elaman Qońyr. Derek: egemen.kz. Sýret: worlseriesboxing.com.
