Foto: Úkimettiń baspasóz qyzmeti
Forýmda ótken jyly eki el arasyndaǵy taýar aınalymynyń 31%-ǵa artyp, $5,5 mlrd-qa jetkeni atap ótildi. Bul rekordtyq kórsetkishtiń $3,6 mlrd-yn qazaqstandyq eksport qurap otyr. Búginde Qazaqstanda fransýz kapıtalynyń qatysýymen 200-den astam kompanııa belsendi jumys istep, jalpy ınvestısııa kólemi $20 mlrd-qa jaqyndaǵan. Qazaqstan Fransııa úshin Ortalyq Azııadaǵy basty serikteske aınalǵan: aımaqpen júrgiziletin saýdanyń shamamen 80%-y bizdiń eldiń úlesine tıesili.
Premer-mınıstr eki el basshylary arasyndaǵy senimdi qarym-qatynas pen saıası dıalogtyń arqasynda yntymaqtastyq strategııalyq áriptestiktiń keńeıtilgen deńgeıine kóterilgenin atap ótti.
«Fransııamen yntymaqtastyq – Qazaqstannyń syrtqy saıasatyndaǵy negizgi basymdyqtardyń biri jáne Eýropalyq Odaq sheńberindegi seriktestigimizdiń ajyramas bóligi. Bizdiń elderimiz berik saıası baılanystarmen, belsendi úkimetaralyq jáne parlamenttik dıalogpen, sondaı-aq qarqyndy saýda jáne ınvestısııalyq ózara is-qımylmen erekshelenetin berik jáne kópqyrly seriktestikke ıe», dedi Oljas Bektenov.
Úkimet basshysy forým barysynda birqatar mańyzdy jobalarǵa toqtaldy:
- Qazaqstannyń ońtústiginde Total Energies kompanııasymen qýaty 1 GVt bolatyn jel elektr stansııasyn salý;
- Alstom kompanııasymen temirjol sektory boıynsha jańa ınvestısııalar jáne óndiristi oqshaýlaý;
- Air Liquide kompanııasynyń Pavlodar munaı-hımııa zaýytyndaǵy sýtegi energetıkasy jobasy;
- Danone, Lactalis jáne Lidea kompanııalarynyń qatysýymen tamaq jáne sút ónerkásibin damytý.
Aıta keteıik, Qazaqstan Transkaspıı halyqaralyq kólik dálizin damytýǵa jáne jasandy ıntellekt, farmasevtıka, týrızm men sý resýrstaryn basqarý sııaqty salalarda yntymaqtastyqty keńeıtýge múddeli.
Sonymen qatar forýmda bilim jáne ǵylym salasyndaǵy seriktestiktiń jańa kezeńi de sóz boldy. Astanada jáne Almatyda fransýz mektepteri ashylady, Abaı atyndaǵy QazUPÝ bazasynda Lumière ortalyǵy jáne Lotarıngııa ýnıversıtetiniń fılıaly jumysyn bastaıdy.
Premer-mınıstr Qazaqstannyń sheteldik ınvestorlar úshin barynsha qolaıly ahýal jasaýǵa daıyn ekenin bildirip, quqyqtyq kepildikter, salyqtyq jeńildikter, arnaıy ekonomıkalyq aımaqtar men AHQO múmkindikterin erekshe atap ótti.
Is-shara qorytyndysynda energetıka, kólik, densaýlyq saqtaý jáne sý resýrstary salalaryndaǵy birqatar kelisimge qol qoıý josparlanǵan.
