Qalada nıkotın ónimderiniń taralýyna qarsy birneshe júıeli bastama qolǵa alynǵanymen, zııandy zatqa áýestengenderdiń sany azaımaı tur. Sondyqtan maman, uqyqtyq tetikterdi áli de bolsa barynsha kúsheıtý qajet dep esepteıdi.
Osy baǵytta iske asqan «Veıpsiz jastyq» jobasy aıasynda veıp-shoptar men kalıan-barlarǵa reıdter uıymdastyrylǵan. Sońǵy birer aıdyń ózinde, qoǵamdyq orynda kalıan shekken 100 adamǵa aıyppul salynypty.
«Keı jastar kalıandy qaýipsiz dep qabyldaıdy. Alaıda bir ret kalıan shegý — 100 temeki tartqanmen teń. Onyń tútininde nıkotın, shaıyr jáne aýyr metaldardyń mólsheri temekiden 3–5 ese kóp bolýy múmkin. Kalıandy jabyq bólmede shekkende, onyń tútini ınfeksııalyq aýrýlardyń taralýyna jaǵdaı jasaıdy. Al bir múshtikti birneshe adamnyń qoldanýy — juqpaly aýrýlar úshin tikeleı jol. Kalıan – aǵzany ýlaıtyn qural ǵana emes, jastardy táýeldilikke ıtermeleıtin áleýmettik qubylys. Ol temekiden de qaýipti», – deıdi R. Tátıeva.
Sarapshylardyń pikirinshe, adam zııandy ádetten neǵurlym erterek bas tartsa, oǵan qaıta oralý yqtımaldyǵy soǵurlym azaıady. Sondyqtan jastardyń salaýatty ómir saltyn ustanýyna jaǵdaı jasaý — memleket pen qoǵamnyń ortaq ári mańyzdy mindeti.
