Búgingi kúnniń basty mindeti – tek qazirgi jumysshylardyń ál-aýqatyn jaqsartý ǵana emes, sonymen qatar erteńgi óndiris kóshin alǵa súıreıtin jas mamandardy der kezinde qoldap, olarǵa sapaly bilim men kásibı damýǵa naqty múmkindik berý. Bul – el bolashaǵyna baǵyttalǵan berik ári uzaqmerzimdi ınvestısııa.
Bolashaq ınjenerlerdiń jeńisi: otandyq oqýshylar Hıýstonda top jardy
О́tken aıda «Samuryq-Qazyna» qoldaýymen otandyq oqýshylar AQSh-tyń Hıýston qalasynda ótken FIRST halyqaralyq robottehnıka chempıonatynda erekshe nátıje kórsetti.
6 men 18 jas aralyǵyndaǵy komandalar el namysyn abyroımen qorǵap, Champions Award jáne Inspire Award syndy bedeldi marapattardy ıelendi.
Keıingi jyldary Qazaqstanda ınjenerlik jáne tehnıkalyq bilimge qyzyǵýshylyq artyp keledi. Buryn elge nebári 4 kvota bólinse, bıyl 7 kvota usynylyp, oǵan Almaty, Astana, Qaraǵandy jáne Pavlodar qalalarynan 86 oqýshy ıe boldy.
1000 top pen 50 000 adamnyń arasyndaǵy bul jeńis – tek oqýshylar úshin emes, búkil el úshin úlken maqtanysh.
20 jas úshin 3 jyl tegin: «Samruk Umiti» jobasy oqýshylardy qoldady
Jumysshy mamandyqtaryn qoldaý maqsatynda bıyl sáýir aıynda iske qosylǵan «Samruk Umiti» baǵdarlamasy Pavlodar jáne Shyǵys Qazaqstan oblystaryndaǵy balalar úıleriniń 100 tárbıelenýshisin qamtydy. Búginde olardyń 28-i óz bolashaǵyn jumysshy mamandyqtarymen baılanystyrýǵa sheshim qabyldady. Bul – áleýmettik osal toptaǵy balalarǵa ómirlik jol silteıtin múmkindik.
Jýyrda О́skemendegi GES boıynsha uıymdastyrylǵan sapar barysynda «Samruk Kazyna» kompanııalar toby atynan 20 bala «Elektrenergetıka» mamandyǵy boıynsha qaladaǵy Joǵary polıtehnıkalyq kolledjge tolyq memlekettik grantta oqýǵa joldama aldy. Oqý aqysy memleket esebinen óteledi, stıpendııa – 41 myń teńge, jataqhana men úsh mezgil tamaq – tegin. Úsh jyl ishinde stýdentter kásiporynda tájirıbeden ótip, úzdikteri turaqty jumys ornymen qamtylady dep josparlanyp otyr.
Joba iske qosylǵanyna nebári birneshe aı ǵana bolsa da, alǵashqy nátıjesin kórsetti. Bul – «Samruk Umiti» bastamasynyń qajettiligi men tıimdiligin dáleldeıtin naqty qadam.
О́ńirge oralar bilikti mamandar: 177 jas – kásip jolynda
Mańǵystaý oblysynda jumysshy mamandyqtarynyń mártebesin kóterip, óńir ekonomıkasyn ártaraptandyrýǵa baǵyttalǵan biregeı baǵdarlama – jastarǵa naqty baǵyt berip, senim uıalatqan bastama. «Samruk-Kazyna» qorynyń qoldaýymen úsh jyl ishinde 177 jasóspirim elimizdiń 10 óńirindegi tehnıkalyq kolledjderge oqýǵa tústi.
2023 jyly alǵashqy 2 túlek oqýyn támamdasa, byltyr bul kórsetkish 36 adamǵa jetti. 38 dıplom alǵan mamannyń 30-y joǵary oqý ornyna túsip, 4-i jumysqa ornalasyp úlgerdi.
Bıyl 72 qatysýshy kolledj dıplomyn alýǵa daıyndalyp jatyr. Olardyń teń jartysy – jumysshy mamandyqtar ıegeri.
Baǵdarlama túlekteri – bolashaq ınjenerler, energetıkter, taý-ken jáne tehnıkalyq sala mamandary. Al bıylǵy túlekterdiń tańdaýy medısına, ınjenerııa, kólik jáne qyzmet kórsetý salalaryna deıin keńeıip otyr. Bul – jastardyń eńbek naryǵyna beıimdelip, suranysqa saı sheshim qabyldap jatqanyn kórsetedi.
«Samruk Kazyna» usynǵan baǵdarlama – jaı grant emes, jastarǵa kásipke jol ashatyn, ómirlik tájirıbe beretin áleýmettik kópir. О́ndiris úshin teorııa men tájirıbeni qatar meńgergen maman – basty suranys. Bul joba sol qajettilikti ishki resýrspen sheship, jastardy týǵan jerde qalýǵa yntalandyrýdyń naqty úlgisine aınaldy.
Kásipke bet burǵan 68 úmit
«Samruk-Kazyna Trust» qoldaýymen júzege asyp jatqan eki baǵdarlama aıasynda búginde 277 bala bilimmen qamtylyp otyr. Onyń 68-i – óz bolashaǵyn jumysshy mamandyqtarymen baılanystyrýdy tańdady.
Bul – eldiń óndiristik áleýetine qosylǵan 68 tirek, eńbek adamyna degen shynaıy qurmettiń kórinisi.
Atalǵan jobalar – jańa tamyr jaıyp kele jatqan bastamalar. Naqty nátıjeleri ýaqyt óte aıqyn kórineri anyq, óıtkeni bilim men kásibı daǵdyǵa salynǵan ınvestısııa – eń turaqty ári uzaqmerzimdi qaıtarym beretin kapıtal. Búgin berilgen baǵyt pen múmkindik erteń tek bir otbasynyń emes, tutas óńirdiń áleýmettik-ekonomıkalyq beınesin ózgerte alady. Sondyqtan bul bastamalar – bir sáttik is-shara emes, el bolashaǵyna salynǵan senimdi negiz.
Aıgerim AQShOLAQOVA
