QOSTANAI. 6 mamyr. Qostanaıda Uly Otan soǵysynyń ardageri, Qazaqstan Respýblıkasyna eńbegi sińgen zańger Ivan Býgaev turǵan úıdiń qabyrǵasyna memorıaldyq taqta ilindi. Bul týraly egemen.kz tilshisi habarlady.
Ivan Mıhaılovıch Býgaev Uly Otan soǵysynyń ardageri, elimizge eńbegi sińgen zańger jáne Qostanaı qalasynyń qurmetti azamaty bolatyn. Ol sot júıesinde 35 jyl qyzmet etti. Memorıaldyq taqtanyń ashylý saltanatynda onyń shákirtteri, zamandastary sóz aldy.
Sot júıesiniń ardageri Tursynbaı Jarmuhanbetov: «Men Býgaev aqsaqalmen 14 jyl birge qyzmet ettim. Ol naǵyz ustazym, aqylshym boldy. Sol úshin men oǵan qaryzdarmyn. Men birge qyzmettes bolǵan alty sýdıanyń tórteýi soǵys ardageri bolatyn. Sottaǵy tártip te soǵystaǵy tártippen birdeı edi», dedi.
Ivan Býgaev soǵysta 1943 jyly aýyr jaralanyp, gospıtalde uzaq emdeledi, bir qolyn kesýge týra keledi. Ol qatarǵa qosylǵan soń, 1944 jyly Ýkraınaǵa oqýǵa jiberiledi. Sonda qyzmet istep júrgende Ýkraınada taǵy bir soǵys bastalady. Soǵys kezinde Batys Ýkraınany nemisterden azat etý kezinde Ternopol, Roven, Drogobychskıı ı Lvov oblystarynda ultshyldardyń uıymynda bolǵan bandalar qalyp qoıady, olarmen kádimgideı soǵys júredi. Urys kezinde Býgaev taǵy da jaralanady. Ol jaraqaty jazylǵannan keıin oqý kerektigin túsinip, Almatydaǵy zań ınstıtýtyn bitiredi. Odan keıingi ómiriniń barlyǵy Qostanaıda ótedi. Ol oblystyq sotta 13 jyl sot tóraǵasynyń orynbasary qyzmetin atqarady.
Oblystyq sot tóraǵasy Ǵalymjan Myrzake: «Ivan Mıhaılovıchti umytýǵa bolmaıdy. Ol búgingi kóptegen bilikti zańgerlerdiń ustazy bolǵan kisi» dedi.
Býgaev ómiriniń sońǵy jyldaryn ótkizgen oblys ortalyǵynyń Tolstoı kóshesindegi 69 úıdiń qabyrǵasynda elimizdiń belgili tulǵalary Uly Otan soǵysynyń batyry Seıthan Temirbaevqa, aıaýly ustaz Vasılıı Makotchenkoǵa jáne jazýshy Serik Shákibaevqa da memorıaldyq taqta ilingen. Olardyń qataryna Ivan Býgaev qosyldy.
Názıra Járimbetova.
Derek, sýret: ng.kz
