Is-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, Qytaı Kommýnıstik partııasy Ortalyq komıteti úgit-nasıhat bólimi meńgerýshisiniń orynbasary Hý Hepın, QHR Ult isteri jónindegi komıteti tóraǵasynyń orynbasary Go Veıpın, QHR Shetel ádebıetin basyp shyǵarý jáne taratý jónindegi bas basqarmasynyń jetekshisi Dý Chjanıýan, sondaı-aq QHR-dyń Qazaqstan Respýblıkasyndaǵy Tótenshe jáne ókiletti elshisi Han Chýnlın qatysty.
Alǵash bolyp sóz alǵan QKP Ortalyq komıteti úgit-nasıhat bólimi meńgerýshisiniń orynbasary Hý Hepın qazaq tilinde jaryq kórgen Sı Szınpınniń «El basqarý jóninde» atty kitaby eki el arasyndaǵy dıplomatııalyq qarym-qatynastardy tereńdete túsetinine, Qytaı men Qazaqstan yntymaqtastyǵyn odan ári arttyryp, ózara tájirıbe almasýǵa septigin tıgizetinine, memleketterdiń birlesken strategııalaryna tyń serpilis beretinine toqtaldy.
Al Mádenıet jáne aqparat mınıstri Aıda Balaeva Qytaı Halyq Respýblıkasynyń Tóraǵasy Sı Szınpınniń el basqarý fılosofııasy, ishki jáne syrtqy saıasatqa kózqarasy, sondaı-aq Qytaıdyń ekonomıkalyq jáne áleýmettik damý strategııalaryn qamtıtyn «El basqarý jóninde» atty kólemdi eńbeginiń mán-mańyzyna keńirek toqtaldy.
«Bul kitap – Qytaı memleketiniń saıası baǵyt-baǵdaryn, ulttyq birlik pen turaqtylyqty qamtamasyz etýdegi ustanymdaryn, sondaı-aq uzaqmerzimdi strategııalyq maqsattaryn túsinýge umtylatyn qazaq oqyrmandary úshin qundy derekkóz bolmaq. Sonymen qatar týyndy – Qytaıdyń halyqaralyq arenadaǵy ustanymdary men rólin saralaýǵa múmkindik beretin mańyzdy eńbek», dedi A.Balaeva.
Sondaı-aq mınıstr Qytaı Qazaqstan úshin senimdi dos, odaqtas ári strategııalyq seriktes ekenine, eki el arasyndaǵy ǵasyrlar boıǵy dostyq, ózara qurmet pen senimge negizdelgen yntymaqtastyq aldaǵy ýaqytta tabysty damı beretinine toqtaldy.
«Memleketterimizdiń basshylary arasyndaǵy ózara túsinistik pen joǵary deńgeıdegi senim – ekijaqty qarym-qatynastardyń nyǵaıýyna zor yqpal etip keledi. Sondyqtan da Qazaqstan men Qytaı arasyndaǵy strategııalyq áriptestigimiz – ekonomıkalyq damý, óńirlik qaýipsizdik pen mádenı-gýmanıtarlyq saladaǵy tyǵyz baılanystardyń berik irgetasy bolaryna senemiz», dedi mınıstr.
Tusaýkeserde sóz sóılegen dıplomattar Sı Szınpınniń «El basqarý jóninde» kitabynyń saıasattanýshylar, halyqaralyq qatynastar salasynyń mamandary, qytaı tilin, mádenıeti men qoǵamdyq qurylymyn zertteýshiler úshin asa mańyzdy eńbek ekenin atap ótti. Sondaı-aq bul kitap sarapshylar men zertteýshiler, isker orta men kásipkerler qaýymdastyǵy úshin Qytaı ekonomıkasynyń tetikterin, onyń jumys isteý qaǵıdatyn bilýge, ınvestısııa úshin jańa ıdeıalar men jańa bıznes-josparlardy týdyrýǵa kómektesetini aıtyldy.
