Sport • 31 Mamyr, 2025

Jarys kúndeligi

130 ret

kórsetildi

3 mın

oqý úshin

Bangkokta «Taıland Oýpen 2025» týrnıriniń shırek fınalynda kópshilik kútken jekpe-jek 65 kg salmaqta ótti. Bul básekede álem chempıonatynyń kúmis júldegeri Dýlat Bekbaýov Parıj Olımpıadasynyń qola júldegeri Qyrǵyz Munarbek Seıitbekulyn utty. Nursultan Altynbek (55 kg) japonııalyq Seıdjýro Mıdzogýtıdi jeńdi. Nurzat Ońǵarovtyń (50 kg) ońtústikoreıalyq Taegıýn Iýnnan, Dıas Moljigitovtiń (80 kg) ındonezııalyq Maıhel Roberd Mýskıten mysy basym tústi. Gúlnaz Bóribaeva (48 kg) ýkraınalyq Olga Shalımovaǵa ese jiberdi. Jartylaı fınaldyń alǵashqy kúni jerlesterimiz sátsiz óner kórsetti. N.Altynbek pen D.Bekbaýov rıng qojaıyndarynan utyldy. Danııar Raqymberdınov (90 kg) qytaılyq Han Sıýjenge jol berdi. Vıktorııa Grafeeva (60 kg) men Gúlsaıa Erjan (80 kg) óz qarsylastaryn qapy qaldyrdy.

Ǵalym SÚLEIMEN

Bakýde shaǵyn fýtboldan ótip jatqan álem chempıonatynyń toptyq týrnıriniń sońǵy matchynda elimizdiń quramasy AQSh-tan 5:3 esebimen basym tústi. Biraq osy jeńistiń ózi aıaqdop sheberlerimizge pleı-off saıysyna joldama alýǵa jetkiliksiz boldy. О́z tobynda Bosnııa men Gersegovına, Polshany alǵa jibergen jerlesterimiz úshinshi oryn alyp, atalǵan jarysty aıaqtady.

Astanada áıelder kúresinen el kýbogi jolyndaǵy jarys aıaqtaldy. Jarysta myna burymdylar altynnan alqa taqty: 50 kg – Svetlana Ankıcheva (Astana), 53 kg – Irına Jánibekova (Qaraǵandy), 55 kg – Zúlfııa Iаhıarova (Qaraǵandy), 57 kg – Laýra Álmaǵambetova (Qostanaı), 59 kg – Vıktorııa Hýsaınova (Aqmola), 62 kg – Tynys Dýbek (Almaty oblysy), 65 kg – Elena Shalygına (Astana), 68 kg – Beıbit Seıdýaly (Shymkent), 72 kg – Álbına Qaıyrgeldınova (Aqmola), 76 kg – Elmıra Syzdyqova (Qaraǵandy).

Astanada kórkem gımnastıkadan elimizdiń chempıonaty óz máresine jetti. Jekelegen kópsaıysta Aıym Meıirjanova (Astana) altynnan alqa taqsa, Erıka Jaılaýova (Astana) men Mılana Parfılova (Shymkent) ekinshi, úshinshi oryndardy enshiledi. Toptyq jattyǵýda elordalyq arýlar aldaryna jan salmady. Olar jalpykomandalyq esepte de jeke-dara kósh bastady.

Reseılik Sofıa Lanseremen jup qurǵan Sandýǵash Kenjebaeva Qytaıdyń Manshan qalasynda uıymdastyrylǵan ITF týrnırinde top jardy. Fınalda olar Meıkı Go (Qytaı)/Peangtarn Plıpýechti (Taıland) 6:3, 3:6, 10:8 esebimen utty. Bul – Sandýǵashtyń bıylǵy maýsymdaǵy tórtinshi tıtýly. Buǵan deıin qazaq tennısshisi Túrkııanyń Antalıasynda ótken úsh týrnırde bas júldeni oljalady.

Maýsym aıynyń alǵashqy onkúndiginde Germanııada trektegi velosporttan tórt birdeı dúbirli doda ótedi. Olar – «Bahnen-Tournee» (1 maýsym), «Oberhausener Nachtrennen» (6 maýsym), «Bahnen-Tournee Darmstadt» (7-8 maýsym), «Dudenhofen» (9 maýsym). Nemis jerindegi jarysta el namysyn Ramıs Dinmuhamedov, Álisher Jumaqan, Ilıa Karabýtov, Andreı Chýgaı, Kırıll Kýrdıdı, Ramazan Muhtar, Danııar Shaıahmetov syndy veloshabandozdar qorǵaıdy.