Sý resýrstary jáne ırrıgasııa mınıstrligi Sý resýrstarynyń ulttyq aqparattyq júıesin ázirleýdi jalǵastyryp jatyr. Búgingi tańda bul júıeniń tórt modýli pılottyq rejımde sátti jumys istep tur. Olar: «Ákimshilik», «Sý paıdalaný», «Transshekaralyq sý» jáne «Kartografııa» modýlderi.
«Ákimshilik» modýli júıeni ortalyqtandyrylǵan basqarýǵa arnalǵan. Ol paıdalanýshylardy basqarý, júıe múmkindikterin baptaý, qol jetkizý deńgeıin baqylaý jáne aqparattyq qaýipsizdikti qamtamasyz etý sekildi fýnksııalardy oryndaıdy.
«Sý paıdalaný» modýli respýblıka boıynsha 86 sý qoımasynan kún saıyn derekter jınap, olardy óńdeıdi. Bul sý resýrstarynyń jaı-kúıin jedel baqylaýǵa jáne qajetti sheshimder qabyldaýǵa múmkindik beredi.
«Transshekaralyq sý» modýli Qazgıdromettiń 43 gıdrobeketinen derekter jınaıdy jáne memleketaralyq kanaldardaǵy sý shyǵyny jáne sý qoımalarynyń jumys rejımderi týraly óńirlik kózderden alynǵan aqparatpen tolyqtyrylady. Bul transshekaralyq ózen basseınderindegi sý resýrstaryn keshendi túrde basqarýǵa jol ashady.
«Kartografııa» modýli Esil jáne Jaıyq-Kaspıı basseınderindegi 250-den astam gıdrotehnıkalyq nysan, ózen-kólder jáne 334 gıdrobeket boıynsha málimetterdi karta túrinde kórsetýge múmkindik beredi. Sondaı-aq sý shyǵynyn, temperatýrany, jaýyn-shashyn men qardyń erýin qysqa merzimdi jáne uzaq merzimdi boljaý fýnksııalary iske asyryldy.
«Sý resýrstarynyń ulttyq aqparattyq júıesin ázirleý Eýrazııalyq damý bankiniń granty esebinen júzege asyrylady. Júıeniń engizilýi sý teńgerimin boljaý dáldigin arttyrýǵa, sý resýrstaryn tıimdi basqarýǵa, sondaı-aq gıdrotehnıkalyq nysandar men ırrıgasııalyq ınfraqurylymnyń jumysyn jaqsartýǵa múmkindik beredi», - dedi SRIM Sıfrlandyrý departamentiniń dırektory Meırgýl Qýandyqova.
