Erlan Qoshanov pen Nýrıddın Ismoılov bastaǵan depýtattar ortalyqtyń ǵylymı jobalarymen, sondaı-aq «Astana Hub» bazasynda júzege asyrylyp jatqan jasandy ıntellekt salasyndaǵy almatylyq startaptarmen tanysty.
Qazaqstan men О́zbekstan arasyndaǵy parlamentaralyq yntymaqtastyq keńesiniń ekinshi otyrysy aıasynda qos eldiń depýtattary Qasym-Jomart Toqaev pen Shavkat Mırzııoevtiń aqparattyq tehnologııalar men jasandy ıntellekt salasyn damytý jónindegi tapsyrmalaryn júzege asyrýda kúsh biriktirý máselesine erekshe nazar aýdardy.
Osyǵan baılanysty Parlament delegasııalary Ál-Farabı atyndaǵy Qazaq ulttyq ýnıversıtetiniń janyndaǵy «Farabi Hub» bazasynda júzege asyrylyp jatqan jobalarmen tanysty. Depýtattarǵa «Farabi Robotics» óndiristik robototehnıka quzyretter ortalyǵynyń jobalary tanystyryldy. Solardyń biri – jerasty shahtalaryn tekserýge arnalǵan robot-ıt. Ǵylymı jobalardan bólek, ortalyq óndiristik kásiporyndarǵa arnalǵan robottardy qurastyrý, baptaý jáne jańǵyrtý boıynsha kadrlar daıyndaıdy. Sondaı-aq munda óndiriste keńinen qoldaný úshin jańa materıaldardy 3D formatta basyp shyǵarý jumystary júrgizilýde.
Sonymen qatar qonaqtar Astana Hub ekojúıesine qatysýshylardyń jasandy ıntellekt salasyndaǵy birqatar tabysty startap-jobasymen tanysty. Mysaly: Codiplay (balalar men jasóspirimderge sıfrlyq daǵdylardy úıretýge arnalǵan ekojúıe), Pleep (jasandy ıntellekt negizindegi onlaın-satylym menedjerin qurý júıesi), AIDENTIS (jasandy ıntellekt arqyly adamnyń tis qısaıýyn dıagnostıkalaý), Dereknet jáne NeuronOil (munaı-gaz ken oryndarynyń sıfrlyq syńarlaryn jasap, munaı, gaz jáne basqa komponentterdi óndirýdi aldyn ala boljaýǵa múmkindik beretin júıeler). Barlyq startap qazirdiń ózinde óndiriske endirý kezeńine jetken, keıbiri shetelde de qoldanylýda.
Sondaı-aq depýtattarǵa «Farabi Hub» ortalyǵynyń zerthanalarynda alynǵan munaı-hımııa, medısına, baqylaý-ólsheý esepteýleri jáne basqa salalardaǵy ǵylymı zertteý nátıjeleri kórsetildi.
Ál-Farabı atyndaǵy QazUÝ rektory Janseıit Túımebaev ýnıversıtettiń damý perspektıvalary men sýperkompıýterlik klasterdi engizý jumysy týraly baıandap berdi. Bul klasterdiń múmkindikteri ýnıversıtet ǵalymdarynyń ǵylymı jobalary men tájirıbelerinde keńinen paıdalanylyp jatqanyn atap ótti.
«Astana Hub» bas dırektory Maǵjan Mádıev startaptardy qoldaý ortalyǵynyń ekojúıesin tanystyryp, Halyqaralyq jasandy ıntellekt ortalyǵyn qurý josparymen bólisti. Bul jobanyń maqsaty – jasandy ıntellektini zertteý men túrli salalarda qoldanýdy qamtamasyz etetin tutas ınfraqurylym qurý.
Depýtattar sondaı-aq Ábilhan Qasteev atyndaǵy Memlekettik óner mýzeıine bardy. Qonaqtarǵa Oral Tańsyqbaevtyń shyǵarmashylyǵyna arnalǵan kórme tanystyryldy. Sýretshi murasy 100 jyldan astam ýaqyt boıy qazaq pen ózbek halqyn baılanystyryp keledi.
