Foto: QR Ulttyq mýzeıi
Demalys kezeńderinde balalar kez-kelgen mýzeıge tegin kire alady
Aıta ketken jón, Mınıstrliktiń buıryǵyna sáıkes mektep oqýshylary úshin kúzgi, qysqy, kóktemgi, jazǵy demalys kezeńderinde respýblıkalyq mýzeıler men mýzeı-qoryqtardyń kez-kelgenine kirý tegin.
Búginde Mınıstrlik jergilikti deńgeıdegi ákimdikterge mýzeıler men mýzeı-qoryqtarda jazǵy demalys kezeńinde balalarǵa tegin kirýdi qamtamasyz etý týraly usynys engizdi, bul baǵyttaǵy jumystar Mınıstrliktiń baqylaýynda tur.
Teatrǵa tegin kirý bilim mekemeleriniń teatrǵa aldyn-ala jibergen resmı hatynyń negizinde júzege asyrylady. Bul rette balalardyń spektaklge kirýi qoıylymnyń jas shekteýine baılanysty, 16 jasqa tolmaǵan balalar qasynda eresek adam bolmasa, teatr spektakline kire almaıdy. Osyǵan oraı, teatr uıymdaryna oqýshylardyń tegin kirýi olardyń tikeleı repertýarlyq josparyna sáıkes uıymdastyrylady.
Sol sekildi otandyq mýzeılerge de jazǵy demalys kezinde kishi jastaǵy balalar ata-anasymen nemese ózge de qamqorshylarymen (tárbıeshi, muǵalim) birge kelýi shart. Ata-ana, synyp jetekshisimen kelgen jaǵdaıda úlkenderdiń mýzeıge kirý aqysy preıskýrant boıynsha tólenedi.
Statıstıkalyq derekter
2024 jyldyń statıstıkasyna súıensek, Mádenıet jáne aqparat mınıstrligine baǵynysty elordadaǵy respýblıkalyq úsh teatrda 3 958 balaǵa tegin qoıylym kórsetilgen. Sonyń ishinde, «Astana Balet» teatrynda 260 qaıyrymdylyq aksııasy, Qalıbek Qýanyshbaev atyndaǵy qazaq ulttyq mýzykalyq drama teatrynda 1 384, «Astana Opera» Memlekettik opera jáne balet teatrynda 2 314 balaǵa tegin qoıylym uıymdastyrylǵan. Astana qalasynyń ákimdigine qarasty teatrlarda da múmkindigi shekteýli jandar men kópbalaly otbasylarǵa arnalǵan qaıyrymdylyq aksııalary men memlekettik merekelerdi qosa alǵanda 11 081 balaǵa tegin spektakl kórsetilgen.
Atalǵan baǵyttaǵy jumys bıyl da jalǵasyp, elordalyq úsh respýblıkalyq teatrda 1 205 balaǵa tegin qoıylym jasalyp, qala ákimdigine qarasty teatrlarda 5 651 bala úshin tegin qoıylym kórsetilgen.
Mınıstrlik júrgizetin statıstıkalyq derekter boıynsha QR-nyń Ulttyq mýzeıi men «Bozoq» memlekettik tarıhı-mádenı mýzeı-qoryǵyna 2017 jyldan beri toqsan aralyq jáne jazǵy demalysta 700 myńǵa jýyq oqýshylar tegin kirgen.
«Bozoq» memlekettik tarıhı-mádenı mýzeı-qoryǵy jyl saıyn jazǵy demalys kezeńinde «Jas arheolog» atty jazǵy mektebi, «Sholpy taǵý», «Atqa mingizý», «Qymyzmuryndyq» t.b. sekildi etnografııalyq meıramdar men festıvalderdi ótkizip keledi. QR-nyń Ulttyq mýzeıinde «Sýret jáne keskindeme» atty mýzeılik dárister serııasy, qolóner sheberleriniń sheberlik synyptary balalar arasynda suranysqa ıe dep aıtýǵa bolady.
Ulttyq mýzeıdegi «Keskindeme jáne grafıka» úıirmesi
QR Ulttyq mýzeıiniń 7-16 jas aralyǵyndaǵy mektep oqýshylaryna arnalǵan «Keskindeme jáne grafıka» úıirmesi beıneleý óner, grafıka, músin ónerine baýlýdy kózdeıdi. 2015 jyly jumysyn bastaǵan úıirmege QR Dızaınerler odaǵynyń múshesi, Qazaq ulttyq óner ýnıversıtetiniń Músin jáne keskindeme kafedrasynyń oqytýshysy Baıbosynov Muhtar Qaıratuly jetekshilik etedi.
Jyl saıyn 1 maýsym – Balalardy qorǵaý kúni merekesine oraı atalǵan úıirme jyldyq jumys qorytyndysy men mýzeıdegi sheberlik saǵattarynda jasalǵan úzdik jumystardyń nátıjesi retinde «Balavision» atty sýret kórmesin uıymdastyrady. Osy ýaqytqa deıin 15-ke jýyq kórme ótkizilip, úıirmege qatysýshy oqýshylar jyl boıy erekshe qyzyǵýshylyq tanytyp, óz boılaryndaǵy shyǵarmashylyq qabiletterin arttyra túsken. Bıyl 1 maýsymda óskeleń urpaq arasynda ekosaýattylyqty damytý maqsatynda uıymdastyrylǵan «Balavision-2025: Adam jáne tabıǵat» kórmesinde 20 jas sýretshiniń ártúrli tehnıkada oryndalǵan 40-tan astam týyndylary kópshilik nazaryna usynylǵan.
Atalǵan úıirme jumysynan kútiletin nátıje – oqýshylar kórkemsýret týyndylary men negizgi stıldik baǵyttardy ajyratyp, beıneleý quraldaryn erkin paıdalanyp, sulba men kompozısııalyq eskızder jasaýdy meńgeredi. Jalpy búginge deıin úıirmege 400-ge jýyq bala qatysqan.
Ár aıdyń úshinshi jeksenbisinde mýzeıge kirý tegin
QR Ulttyq mýzeıiniń Ekskýrsııalyq jumystar, mýzeı pedagogıkasy jáne ekspozısııalyq zaldardy saqtaý qyzmetiniń Ekskýrsııalyq qyzmet kórsetý bóliminiń málimetinshe, ár aıdyń úshinshi jeksenbisi – mýzeıge tegin kirý tájirıbesi 2017 jyldan bastap turaqty túrde iske asyrylyp, kelýshiler sany aıtarlyqtaı artqan. 2017 jyldan 2024 jylǵa deıingi aralyqta shamamen 120 myń 560 adam Ulttyq mýzeıge tegin kirgen, al 2025 jyl bastalǵaly bul kórsetkish 6 106 adamdy qurap otyr. Bul málimetter mýzeıdiń keń aýdıtorııany qamtıtyn mádenı platforma retinde qyzmet atqaratynyn kórsetedi.
Aıta ketken jón, atalǵan bastama – mýzeılerdiń kópshilik úshin qoljetimdi bolýyna oń yqpal etip, qoǵamda tarıhı-mádenı muraǵa degen qyzyǵýshylyqty arttyrýǵa zor úles qosty.
Túıindeı aıtqanda, atalǵan kún azamattarǵa óz mádenı murasymen erkin tanysýǵa múmkindik beredi jáne azamattardyń tarıhı-mádenı sanasyn qalyptastyrý turǵysynda mańyzdy ról atqarady.
Aıta ketelik, Mınıstrlikke qarasty respýblıkalyq teatrlarda barlyq sanattaǵy azamattar úshin Dúnıejúzilik teatr kúni, Respýblıka kúni, Bilim kúni, Táýelsizdik kúni, Balalardy qorǵaý kúni kirý tegin.
