Sýrette Sıfrly nusqaýlyqtyń grýzındik avtorlary Iraklı Gvınıanıdze men Anı Sırbıladze
Astana memlekettik qyzmet haby «Memlekettik kommýnıkasııadaǵy jasandy ıntellekt» sıfrlyq nusqaýlyǵyn shyǵardy. Bul memlekettik sektordaǵy baspasóz hatshylary men qoǵammen baılanys mamandaryna arnalǵan alǵashqy praktıkalyq qural.
Qujat osy jyldyń 14-16 mamyrynda Astanada ortalyq jáne jergilikti memlekettik organdardyń 50-den astam baspasóz hatshysy men baspasóz qyzmetkeri qatysqan semınar-praktıkým materıaldary negizinde daıarlandy. Anyqtamalyqta JI paıdalaný boıynsha naqty qadamdar kórsetilip, saraptalǵan JI quraldary men tehnologııalardy qazirgi jaǵdaıda etıkalyq turǵyda, qaýipsiz ári tıimdi qoldaný boıynsha naqty usynystar qamtylǵan.
Memlekettik qyzmetshilerdiń jumysyna jasandy ıntellektti engizý kúndelikti tapsyrmalardy avtomattandyrýǵa, kommýnıkasııany ár jeke tulǵaǵa baǵyttaı otyryp, qurýǵa, qoǵamdyq pikirdi taldaýdy jaqsartýǵa múmkindik beredi. Bul óz kezeginde azamattardyń memlekettik ınstıtýttarǵa degen senimin arttyrady.
Nusqaýlyqta JI memlekettik sektorǵa tabysty ıntegrasııalaý keısteri berilgen. Estonııadaǵy Bürokratt jobasy memlekettik qyzmetterge jappaı qol jetkizetin biryńǵaı sıfrlyq ortaq arna jasaýǵa kómektesse, Fransııa azamattardyń mıllıondaǵan ótinishterin óńdeýdi derbes jasandy ıntellekt Albert arqyly jetildirip jatyr. Al Grýzııadaǵy Úkimet janyndaǵy Jasandy ıntellekt keńsesi chat-bottar, boljamdy taldaý júıeleri jáne memlekettik kommýnıkasııadaǵy etıkalyq standarttardy engizý jumystarymen aınalysady.
Semınar sarapshylary júrgizgen bastapqy saýalnamalar men taldaýlar nátıjesinde jasandy ıntellekt quraldaryn engizý memlekettik qyzmetshilerge monıtorıng pen kontent ázirleýge jumsalatyn ýaqytty 60-70 paıyzǵa qysqartýǵa, kúndelikti prosesterdi avtomattandyrýdy aptasyna 5 saǵatqa deıin jetkizip, jalpy kommýnıkasııany jaqsartýǵa múmkindik beretini anyqtaldy.
Nusqaýlyq Astana memlekettik qyzmet habynyń tapsyrysy boıynsha Grýzııa men otan sarapshylary qatysýymen ázirlendi. Ol jasandy ıntellektti óz qyzmetine ıntegrasııalaýdy kózdeıtin memlekettik qyzmetshilerge arnalǵan jáne etıkalyq normalar, ashyqtyq qaǵıdattary men mádenı konteksti eskerý talaptaryna saı keledi.
