Elshiler ekijaqty áriptestikti ilgeriletýge erekshe kúsh salady

Qazaqstan Prezıdenti Nursultan Nazarbaevqa bizdiń elimizde qyzmetke taǵaıyndalǵan Tótenshe jáne ókiletti elshiler – Kýveıt Memleketinen Tarık Abdýlla Ál-Faradj, AQSh-tan Djordj Albert Krol, Pákistan Islam Respýblıkasynan Abdýl Salık Han, Bolgarııa Respýblıkasynan Vasıl Petkov, Saýd Arabııasy Koroldiginen Gýrm ben Saıd Ál-Mılhan senim gramotalaryn tapsyrdy. Memleket basshysy rásimge qatysýshylardy dıplomatııalyq jumystarynyń bastalýymen quttyqtap, olardyń bizdiń elmen qarym-qatynastardy budan ári damytýdy qamtamasyz ete otyryp, ózderine júktelgen mindetti laıyqty atqaratynyna senim bildirdi. Sizderdiń ju­mystaryńyz álemdegi ahýal tu­raqsyzdana túsken kúrdeli kezeńge tap kelip otyr. Bul – bizdiń jas memleketimiz úshin de salmaqty synaqtar kezeńi. Jańa syn-qaterler jaǵ­daı­ynda Qazaqstan úshin ishki tu­raq­tylyqty, qoǵamdyq kelisimdi saqtaý mańyzdy. Sondyqtan, Qazaqstan halqy Assambleıasy kezekten tys prezıdenttik saılaý ótkizýdi usyndy. Bul bastamany elimiz biraýyzdan qoldap, saılaý bıylǵy 26 sáýirge belgilendi, dedi Qazaqstan Prezıdenti. Nursultan Nazarbaev budan ári aldaǵy saılaý Qazaqstan qoǵamynyń saıası kemeldenýin, demokratııalyq qundylyqtar men zań ústemdigine beriktigin kórsetetinin atap ótti. Qazaqstan barynsha ashyq ári ádil saılaý úderisin qamtamasyz etýge nıetti. Saılaý Qazaqstannyń turaqtylyǵyn qamtamasyz etýge qýatty serpin beredi. Al turaqtylyq – ekonomıka men qoǵamdy jańǵyrtýdyń aýqymdy mindetin atqarýdyń basty sharty, dedi Memleket basshysy. Qazaqstan Prezıdenti búginde elimiz óz damýynyń jańa tarıhı belesinde turǵanyna nazar aýdardy. Álemdegi eń damyǵan 30 eldiń qataryna kirý maqsatynda mańyzdy bes halyqtyq reformany iske asyrý bastalatynyn aıtty. Bular – kásibı jáne avtonomdy memlekettik apparat qalyptastyrý, zań ústemdigin qamtamasyz etý, ındýstrııalandyrý jáne ártaraptandyrýǵa negiz­delgen ekonomıkalyq ósim, bo­lashaǵy birtutas ult, transparentti jáne esep berýshi memleket. Memleket basshysy elimizdiń ári qaraı damýy úshin mańyzdy jobalar jóninde de aıtty. «Nurly Jol» ınfraqurylymdyq damý baǵdarlamasy Qazaq elin Ortalyq Azııa óńiriniń iskerlik, tranzıttik jáne logıstıkalyq habyna aınaldyrýdy kózdeıdi. Muny júzege asyrǵan soń Qazaq eli Azııany Eýropamen jalǵaıtyn eń qysqa joldy qamtamasyz etetinine senimdimin. Astanada ótetin halyqaralyq «EKSPO-2017» kórmesi iskerlik yntymaqtastyq úshin jańa múmkindikter ashatyn bolady. Sonyń bári ózara is-qımyldy arttyrý úshin perspektıvalarǵa jol bastaıdy. Sizderdiń jumystaryńyz ekijaqty baılanystardyń áleýetin barynsha keńeıtýge baǵyttalady dep senemin, dedi Qazaqstan Prezıdenti. Nursultan Nazarbaev, sondaı-aq, Qazaqstan men AQSh arasyndaǵy kópsalaly strategııalyq seriktestiktiń deńgeıi joǵary ekenin qanaǵattanýshylyqpen atap ótti. AQSh Qazaqstannyń táýelsizdigin álem memleketteri arasynan alǵashqylardyń biri bolyp tanydy jáne qaýipsizdigimizge kepildik berdi. Búginde Vashıngtonmen arada bıik deńgeıdegi seriktestiktiń senimdi únqatysýy qalyptasqan. Biz osy úkimetaralyq jáne vedomstvoaralyq tyǵyz qarym-qatynasty joǵary baǵalaımyz. Resýrs óndirý jáne ony álemdik naryqtarǵa tasymaldaýdaǵy energetıkalyq seriktestigimiz belsendi túrde damyp keledi. Qazaqstanda 400-den astam birlesken kásiporyn jumys isteıdi. О́tken jyldyń ózinde ǵana eki el arasyndaǵy taýar aınalymy 2,4 mıllıard dollar boldy, dedi Memleket basshysy. Qazaqstan Prezıdenti eki eldiń halyqaralyq jáne óńirlik problemalar boıynsha ortaq múddelestigi bar ekenine toqtaldy. Bul – ıadrolyq qarýsyzdaný jáne taratpaý, Aýǵanstandy qalpyna keltirý, Ortalyq Azııada turaqtylyqty saqtaý jáne ózge de mańyzdy máseleler. Memleket basshysy, sonymen qatar, Saýd Arabııasy Koroldigi bizdiń arab jáne musylman álemindegi negizgi seriktesimizdiń biri ekenine nazar aýdardy. Koroldik halqy men basshylyǵy Qazaqstan táýelsizdiginiń bastapqy kezeńinde zor dostyq qoldaý kórsetti. Biz ony eshqashan umytpaımyz jáne joǵary baǵalaımyz. Elderimizdiń arasyndaǵy saıası únqatysý senimge qurylǵan. Ol saý­da jáne ekonomıka salalarynda ózara is-qımyl aıasyn keńeıtýge berik negiz qalady. Investısııa, ǵylym, tehnologııa almasý salalaryndaǵy yntymaqtastyq úshin quqyqtyq negiz jáne tıisti jaǵdaı jasalǵan. Aýyl sharýashylyǵy kesheninde, munaı hımııasy, energetıka, kólik, týrızm salalaryndaǵy is-qımyldy arttyrýda ortaq múddelilik bar. Biz Astana men Er-Rııad arasyndaǵy ózara tıimdi yntymaqtastyqty jalǵastyryp, budan ári nyǵaıta túsýge ázirmiz, dedi Qazaqstan Prezıdenti. Nursultan Nazarbaev Kýveıt Memleketimen aradaǵy baılanystardyń júıeli damyp kele jatqanyn atap ótti. Byltyr Ál-Kýveıtte Qazaqstan elshiligi, al bıyl Astanada Kýveıt elshiligi ashyldy. Dıplomatııalyq mıssııalar saıası, saýda jáne ekonomıkalyq, ınvestısııalyq baılanystarǵa tyń serpin beredi dep senemin. Bul oraıda, joǵary deńgeıdegi saparlardyń mańyzy zor ekeni anyq, dedi Memleket basshysy. Qazaqstan Prezıdenti bizdiń elimiz Pákistandy Ońtústik Azııadaǵy mańyzdy ári perspektıvaly seriktes retinde qarastyratynyn aıtty. Biz Islamabadpen aradaǵy saıası jáne ekonomıkalyq baılanystardy keńeıtýge múddelimiz. Qazaqstan – astyq jáne basqa da aýyl sharýashylyǵy ónimderin iri kólemde óndiretin el. Sondyqtan Pákistanǵa agroónerkásip ónimderin jetkizý máselesin qarastyrýymyzǵa bolady. Pákistannyń Azııadaǵy ózara is-qımyl jáne senim sharalary jónindegi keńeske, Álemdik jáne dástúrli dinder kóshbasshylarynyń sezine, Astana ekonomıkalyq forýmyna belsene qatysýyn joǵary baǵalaımyz, dedi Nursultan Nazarbaev. Memleket basshysy Qazaqstan men Bolgarııanyń arasynda dástúrli dostyq baılanystar ornyqqanyna nazar aýdardy. Elderimizdiń arasynda berik quqyqtyq sharttar bazasy jasalyp, úkimetaralyq baılanystar ornyqqan. Parlamentaralyq yntymaqtastyq belsendi damytylýda. Bizdiń saıası únqatysýymyz ekonomıkalyq jáne mádenı-gýmanıtarlyq yntymaqtastyq arqyly bekı túsýde. Qazaqstandaǵy bolgar qaýymy da «halyqtyq dıplomatııada» asa mańyzdy ról atqaryp otyr. Bizdiń elde bolgar etnosynyń myńdaǵan ókili turyp jatyr. О́kinishke qaraı, Qazaqstan men Bolgarııanyń ózara saýda kólemi ázirge aıtarlyqtaı emes. Bul másele birlesken kúsh-jigerdi jumyldyrý arqyly sheshiletinine senimdimin, dedi Qazaqstan Prezıdenti. Nursultan Nazarbaev aldaǵy ýaqytta birlesken aýqymdy jumystar kútip turǵanyna toqtaldy. Bular – VIII Astana ekonomıkalyq forýmy, Álemdik jáne dástúrli dinder kóshbasshylarynyń V sezi, Islam yntymaqtastyǵy uıymynyń qoldaýymen ótetin sharalar jáne basqa iri halyqaralyq jobalar. Qazaqstan taıaý ýaqytta Dúnıejúzilik saýda uıymyna kirgeli otyrǵany málim. Bul qadam sheteldermen yntymaqtastyq aıasyn keńeıtýimizge septigin tıgizeri anyq, dedi Memleket basshysy. Qazaqstan Prezıdenti res­pýb­­lıkamyzdyń ózara senim, teń quqyq­tylyq jáne yntymaqtastyq qaǵı­dattaryna negizdelgen syrtqy saıasaty beıbitshil, teńgerimdi saıasat bolyp qala beretinin aıtty. Sizderdiń qyzmetterińiz yntymaqtastyqty keńeıtip, memleketterdiń qarym-qatynasyna tyń serpin beredi dep úmittenemin, dedi osy oraıda Nursultan Nazarbaev. Sońynda Memleket basshysy elshilerdi Astanadaǵy dıplomatııalyq qyzmetteriniń bastalýymen taǵy da quttyqtap, olarǵa zor tabys jáne qonaqjaı qazaq jerindegi jumystaryna jemis tiledi. Senim gramotalaryn tapsyrý rásiminen soń BAQ ókilderine arnaıy brıfıng ótti. Onda elshiler elder arasyndaǵy yntymaqtastyq jaıynda pikirlerimen bólisip, qarym-qatynasta basymdyq beriletin saıası-ekonomıkalyq baǵyttar týraly aıtyp berdi. Máselen, Kýveıt Memleketiniń Tótenshe jáne ókiletti elshisi óz eliniń Ámiri Sabah ál-Ahmed ál-Djaber as-Sabahtyń Nursultan Nazarbaevqa joldaǵan sálemin jetkizdi. Dıplomat, sondaı-aq, jyly shyraıly qabyldaý men iltıpat úshin Qazaqstan halqyna rızashylyǵyn bildirdi. О́z kezeginde AQSh-tyń Tótenshe jáne ókiletti elshisi Qazaqstandaǵy turaqtylyq pen baq-berekeni atap ótti. Elderimizdiń arasyndaǵy ekonomıka, saıa­sat, mádenıet jáne qaýipsizdik salasynda damyp kele jatqan qarym-qatynastar odan ári nyǵaıyp, tereńdeı túsedi dep úmittenemin. Qazaqstan ekonomıkany damytýdy, saıası júıeni demokratııalandyrýdy júzege asyrýda, ıadrolyq qarýdy taratpaý, sondaı-aq, óńirlik jáne jahandyq beıbitshilik pen turaqtylyq ornatý isine eleýli úles qosyp otyr, dedi D.Krol. Pákistan Islam Respýblıkasynyń Tótenshe jáne ókiletti elshisi aýmaǵy jóninen Ortalyq Azııadaǵy asa iri jáne halyq sany boıynsha ekinshi memleket sanalatyn Qazaqstannyń Eýrazııa júreginde strategııalyq orynǵa ıe bolyp otyrǵanyna toqtaldy. Orasan mol energetıkalyq qory men jedel ekonomıkalyq damý qarqyny arqasynda Qazaqstan baǵa jetpes seriktes jáne óńir damýynyń lokomotıvi bolyp sanalady. Eki eldiń de saýda, qarjy, tehnologııa jáne mádenıet salalarynda odan ári yntymaqtasýǵa qajetti zor áleýeti bar. Qazaqstandaǵy qyzmetimde men kúsh-jigerimdi ekonomıkalyq baılanystardy, sondaı-aq, energetıka, ınfraqurylym jáne kommýnıkasııa salalaryndaǵy yntymaqtastyqty nyǵaıtýǵa jumsaıtyn bolamyn, dedi Abdýl Salık Han. Bolgarııa Respýblıkasynyń Tótenshe jáne ókiletti elshisi eki eldiń arasyndaǵy baılanystardyń tamyry tereńde jatqanyna toqtaldy. «Men yntymaqtastyqty ilgeriletýge, oǵan strategııalyq sıpat berýge bar kúsh-jigerimdi jumsaımyn, óıtkeni, bul úshin qajetti saıası erik-jiger bar. Qazaqstanda 4500 etnostyq bolgar turyp jatyr. Olar respýblıkanyń laıyqty azamattary, eki halyqtyń arasyndaǵy dostyqtyń dánekeri bolyp sanalady. Sonymen qatar, Nursultan Nazarbaev atap ótkendeı, saýda salasynda ıgerilmegen zor áleýet bar. Men osy jáne basqa da baǵyttardy damytýǵa kúsh salamyn, dedi Vasıl Petkov. Saýd Arabııasy Koroldiginiń Tótenshe jáne ókiletti elshisi eki eldiń yntymaqtastyǵy qarqyndy damyp kele jatqanyna toqtaldy. Koroldik pen Qazaqstannyń arasyndaǵy saıası jáne ekonomıkalyq qarym-qatynastar joǵary deńgeıde. Turaqty bolyp turatyn saparlar barysynda kóptegen saýda-ınvestısııalyq kelisimderge qol qoıylady. Sonymen qatar, qazaqstandyqtar Saýd Arabııasyna iskerlik, qajylyq jáne ýmra jasaý maqsatynda da baryp jatady, dedi Gýrm ben Saıd Ál-Mılhan. Dınara BITIKOVA, «Egemen Qazaqstan».