Munda tartylǵan ınvestısııalardyń jalpy kólemi 2,1 mlrd teńgeni quraǵan. Kásiporynda 100-ge jýyq jumys orny qurylyp, óndiristik qýattylyq jylyna 10 mln birlikke deıin ónim shyǵarýǵa múmkindik beredi. Zaýyt ónimderi medısınanyń ártúrli baǵyttarynda — reanımasııa men hırýrgııadan bastap neonatologııa men pedıatrııaǵa deıin suranysqa ıe. «Búkil jeli sertıfıkattalǵan jáne ISO 13485 halyqaralyq sapa standarttaryna sáıkes keledi» deıdi mamandar.
Kásiporynda jobalaýdan bastap klınıkalyq synaqtarǵa deıingi barlyq óndiristik kezeńder qamtylady. Jalpy aýdany 7 000 sharshy metr bolatyn aýmaqta zamanaýı óndiristik jeliler, zerthana jáne qoıma úı-jaılary ornalasqan. О́ndiristik úderisterge ekstrýzııa, qysymmen quıý, frezerleý, jınaý, oraý jáne H14 synypty taza óndiris jaǵdaıynda sterıldeý kiredi.
Zaýyt basshysy Baǵlan Bakkýlovtyń aıtýynsha, naryqta 30 jyldan astam ýaqyttan beri jumys istep kele jatqan kompanııa búginde 169 túrli ónim túrin usynady. Munda shyǵarylatyn ónimder 2670 medısınalyq uıymǵa jetkizilmek. Sonymen qatar, Reseı, О́zbekstan, Qyrǵyzstan, Tájikstan, Belarýs, Iran jáne Aýǵanstan elderine eksport júzege asyrylyp jatyr.
Ashylý saltanaty aıasynda medısına ǵylymdarynyń doktory, Akýsherlik, gınekologııa jáne perınatologııa ǵylymı ortalyǵy dırektorlar keńesiniń tóraıymy Zaýresh Amanjolova zaýyt ónimderi búginde bosaný kezinde qoldanylyp jatqanyn atap ótti. Atap aıtqanda, kásiporyn buǵan deıin otandyq naryqta qoljetimsiz bolǵan jańa týǵan sábılerge arnalǵan qysqyshtardy óndirýdi jolǵa qoıǵan.
