- Jalpy, bolyp jatqan oqıǵany bir aýyz sózben sholsaq, naqty sektorda, ıaǵnı bir taýardy jasaý, shıkizatty óńdep, odan bir zat jasaý isinde Qazaqstan aqyryndap alǵa jyljyp keledi. Bul toqtap turǵannan, nemese keri ketýden áldeqaıda jaqsy. Bizde tek bıýdjettik dıssıplınamen ǵana problema bar. Al ekonomıkanyń naqty sektory, ásirese qaıta óńdeý baǵytynda jaǵdaı jaman emes.
Bizdiń ekonomıkamyzdyń kartınasyn múlde qaıta jazyp, shıkizat satýǵa táýeldi elden sol shıkizatty óńdep, daıyn taýar shyǵaratyn elge aınaldyrý úshin iri jobalardy iske asyrý kerektigin Qazaqstan baıaǵyda túsingen bolatyn. Qazir óńdeý salasynda 17 mega joba jasalýda. Osy kezde bular ne jobalar, sonda naqty ne istelip jatyr degen suraq týyndaıdy, - deıdi sarapshy.
Derekke qaraǵanda, 17 ınvestısııalyq jobanyń jalpy quny shamamen 14,6 trıllıon teńgeni quraıdy.
- Bul bizdiń Ulttyq qordyń teń jartysy. Nemese respýblıkalyq bıýdjettiń kiris bóliginen sál ǵana artyq.
17 jobanyń 9-y ındýstrııa men qurylys baǵytynda. 4 energetıkalyq joba bar. Aýyl sharýashylyǵynda eki joba, týrızmde eki joba.
Osy jobalardyń barlyǵy jumys istegen kezde bizdiń ishki jalpy ónimimizge 7,3 mıllıard AQSh dollary qosylady. 26,4 myń turaqty jumys orny ashylýy tıis, - delingen Aıbar Oljaevtyń jazbasynda.
