Qalalyq qurylys baqylaý basqarmasynyń habarlaýynsha, búgin «Terekti» shaǵynaýdanyndaǵy Aınalma kóshesi, 183-ýchaskede ornalasqan zańsyz turǵyn úı keshenin buzý jumystary bastaldy. Buǵan deıin bul nysan aqparat quraldarynda páter satyp alýǵa usynylmaıtyn turǵyn úıler tizimine engizilgen bolatyn.
Anyqtalǵandaı, nysandy salǵan — «Investment Stroy» JShS. Jospardan tys tekserý barysynda atalmysh qurylys eshqandaı ruqsatsyz júrgizilgeni belgili bolǵan. Osyǵan baılanysty menshik ıesine ákimshilik sharalar qoldanylyp, Almaty qalasynyń Mamandandyrylǵan aýdanaralyq ekonomıkalyq sotyna turǵyn úı keshenin buzý jáne qurylys ornyn qaıta qalpyna keltirý týraly talap aryz berilgen.
"2023 jyldyń 12 shildesinde sot talapty tolyq qanaǵattandyrdy. Keıin apellıasııalyq shaǵym qaralyp, Almaty qalalyq soty alǵashqy sheshimdi kúshinde qaldyrdy. Qazir nysandy buzý jumystary sot oryndaýshylarynyń qatysýymen júrgizilýde" deıdi basqarmadaǵylar.
Qalalyq qurylys baqylaý basqarmasy Almaty turǵyndary men qala qonaqtaryna jyljymaıtyn múlik satyp alar aldynda turǵyn úı kesheniniń barlyq ruqsat qujattarynyń bolýyn muqııat tekserýge keńes berdi. Bul — qarjylyq qaýipsizdik pen zań aldyndaǵy jaýapkershilikti qamtamasyz etýdiń basty joly.
