Daýys berý óte ońaı – eGov Mobile mobıldi qosymshasyn júktep, saýalnamalar bóliminde daýys berý jetkilikti. Qatysýshy 1-den 10-ǵa deıin kitapty tańdap, olardyń ataýy men avtoryn kórsetýi tıis.
Mamandardyń aıtýynsha, bul saýalnama qazaqstandyqtardyń qandaı janrlarǵa kóbirek qyzyǵatynyn anyqtaýǵa kómektesip qana qoımaı, baspagerlerge, kitaphanalarǵa jáne kitap dúkenderine belgili bir baǵyt beredi.
Joba bıyl 23 sáýirde – elimizde alǵash ret Ulttyq quryltaı músheleriniń usynysymen atap ótilgen Ulttyq kitap kúni dúnıege keldi. Bul bastamany Memleket basshysy Qasym-Jomart Toqaev qoldady. Prezıdent qoǵamda oqý mádenıetin qalyptastyrý men ádebıetti nasıhattaýdyń mańyzdylyǵyn birneshe ret atap ótken bolatyn.
Sonymen qatar, «100 kitap» jobasy aıasynda qatysýshylarǵa sımvolıkalyq syılyqtar qarastyrylǵan. Jobanyń seriktesi – «Meloman-MARWIN» dúkender jelisiniń qoldaýymen 5000-shi jáne 11000-shi daýys berýshilerge syılyq kartalary tabystaldy. Bul oqyrmandar úshin jaǵymdy tosynsyı bolyp qana qoımaı, azamattardy súıikti 100 kitapty tańdaýǵa belsendi tartýǵa qosymsha yntalandyrý boldy. Máselen, 5000-shi daýys bergen – almatylyq Akerke Nyshanova bolsa, 11000-shi qatysýshy – Oral qalasynyń turǵyny Maral Jumaǵalıev boldy.
Aıta keteıik, oqý mádenıetin ilgeriletý isine «AMANAT» partııasy da belsendi atsalysýda. 2023 jylǵy qyrkúıekten bastap partııa «Kitap-AMANAT» jobasyn iske asyryp keledi. Joba aıasynda el boıynsha, ásirese shaǵyn qalalar men aýyldarda 23 kitap ortalyǵy ashyldy. Bul ortalyqtarda ádebı keshter, jazýshylarmen kezdesýler, mánerlep oqý saıystary ótedi. Jalpy sany 700-den astam is-shara uıymdastyryldy. Sonymen qatar, joba aıasynda «AMANAT» partııasy men Qazaqstannyń baspagerler, polıgrafıster jáne kitap taratýshylar qaýymdastyǵy arasynda ózara yntymaqtastyq týraly memorandýmǵa qol qoıyldy. Qujat aıasynda baspalar kitap ortalyqtaryn qoljetimdi baǵamen qajetti ádebıettermen qamtamasyz etýde. Bul tek qazaqstandyq ádebıet týyndylary ǵana emes, sonymen birge álemdik bestsellerlerdi de qamtıdy.
