FlyDubai áýe kompanııasynyń reısteri Almatyǵa 15 maýsymda saǵat 02:45 jáne 06:19-da qondy. Ushaq bortynda 332 qazaqstandyq bolǵan, olardyń ishinde 13 maýsymda usha almaǵan jolaýshylar da bar. Atalǵan kúni Taıaý Shyǵysta jaǵdaı kúrt shıeleniskennen keıin birqatar áýe kompanııasy Dýbaı men Abý-Dabıden Qazaqstanǵa jáne basqa elderge reısterdi ýaqytsha toqtatqan edi.
QR Kólik mınıstrliginiń Azamattyq avıasııa komıtetiniń buıryǵyna sáıkes, 13 maýsymnan bastap Iran, Izraıl, Sırııa, Irak, Iordanııa jáne Lıvannyń ústimen, aýmaǵynda jáne mańynda ushýǵa tolyq tyıym salynǵan. FlyDubai reısteri bul aımaqtardy qaýipsiz aınalyp ótip, tek keshikken jolaýshylardy emes, josparly reısterdegi azamattardy da elge aman-esen jetkizdi.
Reısteri keıinge qaldyrylǵan barlyq qazaqstandyqtar “Týrıstik Qamqor” qorynyń qatysýshy týroperatorlary esebinen qonaq úılerge ornalastyryldy. Evakýasııa QR Týrızm jáne sport mınıstrligi, Syrtqy ister mınıstrligi jáne Qazaqstannyń Birikken Arab Ámirlikterindegi elshiligi úılestirýimen júzege asyryldy.
